ഹവാന: വെള്ളിയാഴ്ച ക്യൂബയില്‍ തകര്‍ന്നുവീണ വിമാനത്തിന്റെ രണ്ട് ബ്ലാക്ക്‌ബോക്‌സുകളിലൊന്ന് കണ്ടെത്തി. കാര്യമായ കേടുപാടുകളൊന്നും സംഭവിക്കാത്ത നിലയായിരുന്നു ഇത്. രണ്ടാമത്തെ ബ്ലാക്ക് ബോക്‌സും ഉടന്‍ കണ്ടെത്താനാകുമെന്നാണു പ്രതീക്ഷയെന്ന് ക്യൂബന്‍ ഗതാഗത വകുപ്പു മന്ത്രി അഡെല്‍ വൈസെഡ്ക്വിര്‍ഡോ പറഞ്ഞു.
അപകടത്തില്‍ 110 പേരാണു മരിച്ചതെന്ന് ക്യൂബന്‍ വൃത്തങ്ങള്‍ സ്ഥിരീകരിച്ചു. 11 വിദേശികളും 20 പുരോഹിതന്മാരും ഇതില്‍ ഉള്‍പ്പെടും. അപകടത്തില്‍നിന്ന് അത്ഭുതകരമായി രക്ഷപ്പെട്ട മൂന്ന് സ്ത്രീകള്‍ ഗുരുതരാവസ്ഥയില്‍ തുടരുകയാണ്. അതിനിടെ, വിമാനത്തിന്റെ കേടുപാടുകളെ കുറിച്ചു നേരത്തെ തന്നെ ബന്ധപ്പെട്ടവര്‍ക്കു പരാതി ലഭിച്ചിരുന്നുവെന്ന് രണ്ട് മുന്‍ പൈലറ്റുമാരാണ് വെളിപ്പെടുത്തലുമായി രംഗത്തെത്തി. ക്യൂബന്‍ തലസ്ഥാനമായ ഹവാനയിലെ ജോസ് മാര്‍ട്ടി രാജ്യാന്തര വിമാനത്താവളത്തില്‍നിന്നു പറന്നുയര്‍ന്ന ബോയിങ് 737 യാത്രാവിമാനം ടേക്ഓഫിനു പിന്നാലെ സമീപത്തെ കൃഷിസ്ഥലത്ത് തകര്‍ന്നുവീഴുകയായിരുന്നു. 40 വര്‍ഷത്തോളം പഴക്കമുള്ളതാണു വിമാനം.