ഏഴുവര്‍ഷം മുന്‍പ് മുറിഞ്ഞ വൈദ്യുത കേബിള്‍ പുനഃസ്ഥാപിച്ചില്ല
ചെറുവത്തൂര്‍: വര്‍ഷം ഏഴുകഴിഞ്ഞിട്ടും മുറിഞ്ഞുപോയ വൈദ്യുത കേബിളുകള്‍ പുനഃസ്ഥാപിച്ചില്ല. ഇതേതുടര്‍ന്നു ചെറുവത്തൂരിന്റെ  പടിഞ്ഞാറന്‍ പ്രദേശങ്ങളില്‍ വൈദ്യുതി മുടക്കം പതിവാകുന്നു. വെങ്ങാട്ട് കിഴക്ക്, കണ്ണങ്കൈ, കാട്ടുതല, കാരിയില്‍, മീന്‍കടവ് തുരുത്തി, കുണ്ടുപടന്ന, മയിച്ച തുടങ്ങിയ പ്രദേശങ്ങളിലുള്ളവര്‍ക്കു വെങ്ങാട്ട് റെയില്‍  പാളത്തിനടിയിലൂടെയാണ് കെ.എസ്.ഇ.ബി വൈദ്യുതി എത്തിച്ചിരുന്നത്. റെയില്‍വേയുടെ അറ്റകുറ്റപ്പണിക്കിടെയാണു കേബിള്‍ മുറിഞ്ഞതെന്നു നാട്ടുകാര്‍ പറയുന്നു. ഇതിനുശേഷം ഈ പ്രദേശങ്ങളിലുള്ളവര്‍ക്കു പടന്ന ഫീഡറില്‍ നിന്നാണു വൈദ്യുതി നല്‍കി വരുന്നത്. കേബിള്‍ പുനഃസ്ഥാപിച്ചു വൈദ്യുതി വിതരണം പഴയ രീതിയിലാക്കാനുള്ള നടപടികള്‍ കെ.എസ്.ഇ.ബി സ്വീകരിച്ചിരുന്നു. ഇതിന്റെ അടിസ്ഥാനത്തില്‍ റെയില്‍വേയുടെ അനുമതി വാങ്ങുകയും നിര്‍മാണത്തിനായി  കരാര്‍ നടപടികള്‍ പൂര്‍ത്തീകരിക്കുകയും ചെയ്തു.  കരാറുകാരന്‍ ആവശ്യമായ കേബിളുകള്‍ ഇവിടെ എത്തിക്കുകയും 11 കെ.വി വൈദ്യുതി കടത്തിവിടാനാവശ്യമായ ഒരുക്കങ്ങള്‍ നടത്തുകയും ചെയ്തു. റെയില്‍പാളത്തിനടിയിലൂടെ പൈപ്പുകള്‍ കടത്തിവിട്ട് ഇതിനുള്ളിലൂടെയാണു വൈദ്യുത കേബിളുകള്‍ കടത്തി വിടേണ്ടത്. ഇതിനാവശ്യമായ പൈപ്പുകള്‍  കരാറുകാരന്‍ എത്തിച്ചെങ്കിലും ഈ പൈപ്പ് ഉപയോഗിച്ചു കേബിള്‍ കടത്തിവിടാന്‍ പറ്റില്ലെന്നും ഇതിന് 350 എ.എം വണ്ണമുള്ള സ്റ്റാന്‍ഡേര്‍ഡ് പൈപ്പ് ഉപയോഗിക്കണമെന്നും റെയില്‍വേ അധികൃതര്‍ നിര്‍ദേശിക്കുകയായിരുന്നു.  
എന്നാല്‍, നിര്‍ദേശം അംഗീകരിക്കാന്‍ കഴിയില്ലെന്നും ഇതിനായി വന്‍ സാമ്പത്തിക ബാധ്യത വരുമെന്നും കാണിച്ച് കരാറുകാരന്‍ ഇതില്‍ നിന്ന് പിന്‍മാറുകയായിരുന്നു. ഇതോടെ ഇതിന്റെ പ്രവൃത്തി അനിശ്ചിതത്വത്തിലായി.
ഈ കേബിള്‍ പുനഃസ്ഥാപിച്ചാല്‍ കെ.എസ്.ഇ.ബി പടന്ന ഫീഡറിന്റെ അധിക ഭാരം ഒഴിവാക്കാനും പടിഞ്ഞാറന്‍ പ്രദേശത്തെ വൈദ്യുത ക്ഷാമം പരിഹരിക്കാനും സാധിക്കും. പക്ഷെ പ്രശ്‌നം എങ്ങനെ പരിഹരിക്കുമെന്നതിനെ കുറിച്ച് ആര്‍ക്കും വ്യക്തതയില്ല.