അരീക്കോട്: കടുങ്ങല്ലൂര്‍ തോടും വരണ്ടുണങ്ങിയതോടെ കുടിവെള്ളത്തിനായി ആയിരക്കണക്കിന് കുടുംബങ്ങള്‍  നെട്ടോട്ടത്തില്‍. വേനല്‍ കടുത്തതോടെ കഴിഞ്ഞ കാലങ്ങളെ അപേക്ഷിച്ച് നേരത്തെ തന്നെ തോട്ടിലെ വെള്ളം  വറ്റിയതിനാല്‍ വലിയ പ്രയാസമാണ് പ്രദേശത്തുകാര്‍ നേരിടുന്നത്. കടുങ്ങല്ലൂര്‍ തോട്ടിലെ വെള്ളത്തിന്റെ  തോതനുസരിച്ചാണ്  സമീപത്തെ വീടുകളിലെ കിണറുകളില്‍ വെള്ളമുണ്ടാവുക.
എന്നാല്‍ തോട്  വരണ്ടുണങ്ങിയതോടെ കുടിവെള്ളത്തിന് പുറമെ  തോടിനെ ആശ്രയിച്ചിരുന്ന  നിരവധി കൃഷിയിടങ്ങളും നശിച്ച് കൊണ്ടിരിക്കുകയാണ്.  മഞ്ചേരി മുനിസിപ്പാലിറ്റിയില്‍ നിന്നും തുടങ്ങുന്ന തോട് പുല്‍പറ്റ,  കാവനൂര്‍, കുഴിമണ്ണ, അരീക്കോട് പഞ്ചായത്തുകളിലൂടെയാണ് കടന്ന് പോവുന്നത്. അരീക്കോട്  പഞ്ചായത്തിലെ ഏഴ് വാര്‍ഡുകളിലും കുഴിമണ്ണ, കാവനൂര്‍ പഞ്ചായത്ത് പരിധികളിലും ജനങ്ങള്‍  പ്രധാനമായും ആശ്രയിച്ചിരുന്ന തോട് പൂര്‍ണമായും ഉണങ്ങിയതിനാല്‍ നിരവധി കര്‍ഷകര്‍ക്ക് വലിയ നഷ്ടമാണ് ഇത്തവണ നേരിടേണ്ടി വരിക.
കഴിഞ്ഞ വര്‍ഷം ഏപ്രില്‍ അവസാനം വരേക്കും തോട്ടില്‍ നിന്നു ആവശ്യമായ വെള്ളം ലഭിച്ചിരുന്നതായി പ്രദേശവാസികള്‍ പറയുന്നു. വെള്ളം തടഞ്ഞ് നിര്‍ത്തുന്നതിനായി  തോട്ടില്‍ പതിവ് പോലെ ഇത്തവണയും തടയണ സ്ഥാപിച്ചിരുന്നെങ്കിലും വേനല്‍ കനത്തതോടെ തടയണയും  ഫലം കണ്ടില്ല. ഇതോടെ വലിയ തുക നല്‍കി വാഹനങ്ങളില്‍ വിടുകളിലേക്ക് കുടിവെള്ളമെത്തിക്കുകയാണ്   ചെയ്യുന്നത്. കുടിവെള്ള പ്രശ്‌നം രൂക്ഷമായ ഘട്ടത്തില്‍ പൈപ്പ്‌ലൈനുകള്‍ സ്ഥാപിക്കണമെന്നാവശ്യം  ശക്തമായിട്ടുണ്ട്.