ന്യൂഡല്‍ഹി: ബാബരി മസ്ജിദ് തകര്‍ത്ത കേസില്‍ മുതിര്‍ന്ന ബി.ജെ.പി നേതാക്കളായ എല്‍.കെ അദ്വാനി, മുരളീമനോഹര്‍ ജോഷി, കേന്ദ്ര ജലവിഭവമന്ത്രി ഉമാഭാരതി, കല്യാണ്‍സിങ് തുടങ്ങിയ പ്രതികള്‍ക്കെതിരായ ഗൂഢാലോചനാക്കുറ്റം ഒഴിവാക്കിയതിനെതിരായ ഹരജിയില്‍ വാദം കേള്‍ക്കുന്നത് സുപ്രിംകോടതി ഇന്നത്തേക്കു മാറ്റി. ജസ്റ്റിസുമാരായ പി.സി ഘോഷ്, ആര്‍.എഫ് നരിമാന്‍ എന്നിവരടങ്ങുന്ന ബെഞ്ചാണ് കഴിഞ്ഞദിവസം വാദം കേട്ടിരുന്നത്. എന്നാല്‍ ജസ്റ്റിസ് നരിമാന്‍ മറ്റൊരു ബെഞ്ചിന്റെ തലവനായി മാറിയതോടെയാണ് കേസിന്റെ വാദം കേള്‍ക്കല്‍ ഇന്നത്തേക്ക് മാറ്റിയത്. ജസ്റ്റിസ് ദിപക് ഗുപ്തയാണ് പി.സി ഘോഷിന്റെ ബെഞ്ചില്‍ പുതിയതായി വന്നത്. എന്നാല്‍ കേസ് പരിഗണിക്കാന്‍ തനിക്കൊപ്പം കേസ് ഇതുവരെ കേട്ട നരിമാന്‍ തന്നെ വേണമെന്നും അതിനായി കേസ് നീട്ടിവയ്ക്കുകയാണെന്നും ഇന്നലെ ജസ്റ്റിസ് ഘോഷ് പറഞ്ഞു. ഇന്ന് കേസ് പരിഗണിക്കുമ്പോള്‍ ഘോഷിനൊപ്പം നരിമാനും ബെഞ്ചില്‍ ഉണ്ടാകും.
ഗൂഢാലോചനക്കുറ്റം ഒഴിവാക്കിയ കീഴ്‌ക്കോടതി നടപടിയ്‌ക്കെതിരേ സി.ബി.ഐയും ഹാജി മഹ്്ബൂബ് അഹമ്മദ് എന്നയാളും സമര്‍പ്പിച്ച ഹരജി പരിഗണിക്കുകയായിരുന്നു കോടതി.
ബാബരി മസ്ജിദ് പൊളിച്ച സംഭവത്തിലെ ക്രിമിനല്‍ ഗൂഢാലോചന കേസില്‍ നിന്ന് സാങ്കേതിക കാരണങ്ങള്‍ പറഞ്ഞു അദ്വാനി അടക്കമുള്ളവരെ ഒഴിവാക്കാനാവില്ലെന്ന് ഈ മാസം ആറിന് വാദം കേള്‍ക്കുന്നതിനിടെ സുപ്രിംകോടതി വ്യക്തമാക്കിയിരുന്നു. സി.ബി.ഐക്കു വേണമെങ്കില്‍ ഈ പ്രതികളെ ഗൂഢാലോചനക്കുറ്റത്തില്‍ ഉള്‍പ്പെടുത്തി അധിക കുറ്റപത്രം സമര്‍പ്പിക്കാമെന്നും ജസ്റ്റിസ് നരിമാന്‍ ചൂണ്ടിക്കാട്ടിയിരുന്നു. നിലവില്‍ ഇതു സംബന്ധിച്ച് റായ്ബറേലി, ലഖ്‌നോ കോടതികളിലുള്ള കേസുകള്‍ സംയോജിപ്പിക്കാന്‍ കീഴ്‌ക്കോടതിക്ക് നിര്‍ദ്ദേശം നല്‍കുമെന്നും ബെഞ്ച് വ്യക്തമാക്കിയിരുന്നു. ഇതിനു പിന്നാലെയാണ് ജസ്റ്റിസ് നരിമാനെ മറ്റൊരു ബെഞ്ചിലേക്കു മാറ്റിയത്.
പ്രതികള്‍ക്കെതിരായ ഗൂഢാലോചനക്കുറ്റം ഒഴിവാക്കിയ റായ്ബറേലി വിചാരണക്കോടതി നടപടി 2010 ലാണ് അലഹബാദ് ഹൈക്കോടതി ശരിവച്ചത്. അദ്വാനിയുള്‍പ്പടെ 21 പേര്‍ക്കെതിരേയാണ് കേസില്‍ ഗൂഢാലോചനാക്കുറ്റം ചുമത്തിയിരുന്നത്. ഇതില്‍ ശിവസേനാ നേതാവ് ബാല്‍താക്കറെ, വി.എച്ച്.പി നേതാവ് അശോക് സിംഗാള്‍ എന്നിവര്‍ വിചാരണയ്ക്കിടെ മരിച്ചതിനാല്‍ കേസില്‍ നിന്നൊഴിവാക്കി. കേസില്‍ ഗൂഢാലോചനാകുറ്റം ചുമത്തി ശിക്ഷിക്കുകയാണെങ്കില്‍ കേന്ദ്രമന്ത്രിസഭയില്‍ അംഗമായ ഉമാഭാരതിക്കും രാഷ്ട്രപതി സ്ഥാനാര്‍ഥിയാവുമെന്നു കരുതപ്പെടുന്ന അദ്വാനിക്കും മുരളീമനോഹര്‍ ജോഷിക്കും കനത്ത തിരിച്ചടിയാവും.