തിരുവനന്തപുരം: ഐ.എച്ച്.ആര്‍.ഡി ഡയറക്ടര്‍ നിയമന കേസില്‍ വിജിലന്‍സ് സമര്‍പ്പിച്ച ക്ലീന്‍ ചിറ്റ് റിപ്പോര്‍ട്ട് വിജിലന്‍സ് പ്രത്യേക കോടതി അംഗീകരിച്ചു. ഹരജിയിലെ ആരോപണങ്ങള്‍ കണ്ടെത്താന്‍ കഴിഞ്ഞിട്ടില്ലെന്നും ഐ.എച്ച്.ആര്‍.ഡി നിയമനത്തില്‍ വിദ്യാഭ്യാസ യോഗ്യതകള്‍ പാലിച്ചിച്ചുണ്ടെന്നുമുള്ള റിപ്പോര്‍ട്ടാണ് അംഗീകരിച്ചത്. റിപ്പോര്‍ട്ട് തള്ളണമെന്ന ഹരജിക്കാരുടെ ആവശ്യം നിരസിച്ചു. തിരുവനന്തപുരം വിജിലന്‍സ് പ്രത്യേക കോടതി ജഡ്ജി അജിത്കുമാറിന്റേതാണ് ഉത്തരവ്.
2016 മാര്‍ച്ച് അഞ്ചിനാണ് അനധികൃത നിയമനം നടന്നത്. അന്നത്തെ ധനകാര്യ അഡിഷണല്‍ ചീഫ് സെക്രട്ടറി ഡോ.കെ.എം എബ്രഹാം ഉന്നത വിദ്യാഭ്യാസ വകുപ്പ് അഡീ.ചീഫ് സെക്രട്ടറിയായിരിക്കെ നിശ്ചിത യോഗ്യത ഇല്ലാത്ത ആളെ ഐ.എച്ച്.ആര്‍.ഡിയുടെ ഡയറക്ടറായി നിയമിച്ചു എന്നായിരുന്നു ആരോപണം.
കേസ് അന്വേഷിച്ച വിജിലന്‍സ് ഡോ.കെ.എം എബ്രഹാം ഉള്‍പ്പെടെ ആറു പേര്‍ക്കാണ് ക്ലീന്‍ ചിറ്റ് നല്‍കിയത്. ഉന്നത വിദ്യാഭ്യാസ വകുപ്പ് സെക്രട്ടറി ബി.ശ്രീനിവാസന്‍, സെലക്ഷന്‍ കമ്മിറ്റി അംഗങ്ങളായ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ബംഗളൂരുവിലെ പ്രൊഫസര്‍ ഡോ.ഇ.ജെ.ജെമീസ് ,സംസ്ഥാന ശാസ്ത്ര സാങ്കേതിക കൗണ്‍സില്‍ എക്‌സിക്യൂട്ടീവ് ഡയറക്ടര്‍ ഡോ.സുരേഷ് ദാസ്, മദ്രാസിലെ ഇന്ത്യന്‍ ഇന്‍സ്റ്റിറ്റ്യൂട്ട് ഒഫ് ടെക്‌നോളജി പ്രൊഫസര്‍ ഡോ. പി.ബി.സുനില്‍കുമാര്‍, ഐ.എച്ച്.ആര്‍.ഡി ഡയറക്ടര്‍ ഡോ.സുരേഷ് കുമാര്‍ എന്നിവരായിരുന്നു എതിര്‍കക്ഷികള്‍.