ന്യൂഡല്‍ഹി: ചികിത്സക്കായി വിദേശത്തായിരുന്ന കോണ്‍ഗ്രസ് അധ്യക്ഷ സോണിയ ഗാന്ധി ഇന്ത്യയില്‍ തിരിച്ചെത്തി. ഇന്നു രാവിലെയാണ് അവര്‍ ഡല്‍ഹിയില്‍ എത്തിയത്. മകന്‍ രാഹുല്‍ ഗാന്ധിയും അവരോടൊപ്പമുണ്ടായിരുന്നു.

തീര്‍ത്തും മാറിയ ഒരു രാഷ്ട്രീയ സാഹചര്യത്തിലേക്കാണ് കോണ്‍ഗ്രസ് അധ്യക്ഷയുടെ തിരിച്ചു വരവ്. അഞ്ചു സംസ്ഥാനങ്ങളിലെ തെരഞ്ഞെടുപ്പ് പ്രചാരണങ്ങളില്‍ നിന്നും ആരോഗ്യപരമായ കാരണങ്ങളാല്‍ വിട്ടു നിന്നിരുന്ന സോണിയ ഫലപ്രഖ്യാപന സമയത്ത് വിദേശത്തായിരുന്നു.

സോണിയയുടെ വരവ് കാത്തിരിക്കുകയാണ് കേരളത്തിലെ അണികളും. കെ.പി.സി.സി അധ്യക്ഷന്റെ കാര്യത്തില്‍ താമസിയാതെ തീരുമാനമുണ്ടായേക്കുമെന്ന പ്രതീക്ഷയിലാണ് പ്രവര്‍ത്തകര്‍.

അതേസമയം, അവരുടെ അസുഖം സംബന്ധിച്ചോ എവിടെയായിരുന്നു ചികിത്സക്കു പോയതെന്നോ ഉള്ള കാര്യങ്ങളില്‍ വ്യക്തതയില്ല. അമേരിക്കയിലേക്കാണ് സോണിയ ചികിത്സ തേടിപ്പോയതെന്ന് സ്ഥിരീകരിക്കാത്ത റിപ്പോര്‍ട്ടുകള്‍ ഉണ്ടായിരുന്നു.