പെരിയ: പഞ്ചായത്തിന്റെ എല്ലാ മേഖലകളിലും സാമൂഹികവും സാമ്പത്തികവും സാംസ്‌കാരികവുമായ പുരോഗതി ലക്ഷ്യം വച്ചും പഞ്ചായത്തിന്റെ വികസനത്തിന് കരുത്ത് പകരുന്ന 2017-18 സാമ്പത്തിക വര്‍ഷത്തെപുല്ലൂര്‍- പെരിയ പഞ്ചായത്ത് ബജറ്റ് വൈസ ്പ്രസിഡന്റ് പി കൃഷ്ണന്‍ അവതരിപ്പിച്ചു. ദാരിദ്ര്യലഘൂകരണം, നീര്‍ത്തടാധിഷ്ഠിത വികസന പ്രവര്‍ത്തനങ്ങള്‍, ഗതാഗത സൗകര്യവും റോഡുകളുടെ വികസനവും, ഭവന നിര്‍മാണം എന്നിവയ്ക്ക് പ്രത്യേക ഊന്നല്‍ നല്‍കുന്നതാണു ബജറ്റ്.
സര്‍ക്കാരിന്റെ നവകേരള മിഷന്‍ പഞ്ചായത്ത് തലത്തില്‍ യാഥാര്‍ത്ഥ്യമാക്കുന്നതിലേക്കായി എല്ലാ വിഭാഗങ്ങളെയും ഉള്‍പ്പെടുത്തി സമ്പൂര്‍ണ'ഭവന പദ്ധതി ഇനത്തില്‍ ഒരു കോടിയോളം രൂപ വകയിരുത്തിയിട്ടുണ്ട്. റോഡുകളുടെ വികസനത്തിനായി ഒരുകോടി പതിനെട്ട് ലക്ഷം രൂപയും, മണ്ണ് ജല സംരക്ഷണ പ്രവര്‍ത്തനങ്ങള്‍ക്കായി തൊഴിലുറപ്പ് പദ്ധതിയുലുള്‍പ്പെടുത്തി നാലു കോടി ഏഴു ലക്ഷം രൂപയും വകയിരുത്തി.
ജലനിധി സമ്പൂര്‍ണ കുടിവെള്ള പദ്ധതി ഇനത്തില്‍ നാലു കോടി രൂപയും വിദ്യാഭ്യാസ മേഖലയില്‍ എസ്.എസ്.എ പ്രവര്‍ത്തനങ്ങള്‍ക്കായി ഇരുപത് ലക്ഷം രൂപയും അങ്കണവാടി പ്രവര്‍ത്തനങ്ങള്‍ക്കായി നാല്‍പത്തിയാറ് ലക്ഷം രൂപയും ഉല്‍പാദന മേഖലയില്‍ എണ്‍പത്തി മൂന്ന് ലക്ഷത്തി ഇരുപത്തി അയ്യായിരം രൂപയുടെയും സാംസ്‌കാരിക കലാകായിക പ്രവര്‍ത്തനങ്ങള്‍ക്കായി ഒരു ലക്ഷത്തി അന്‍പതിനായിരം രൂപയും പൊതുജനാരോഗ്യ പ്രവര്‍ത്തനങ്ങള്‍ക്കായി ഇരുപത് ലക്ഷം രൂപയും വകയിരുത്തി. വൃദ്ധ-വികലാംഗ വനിത ശിശു ക്ഷേമ പ്രവര്‍ത്തനങ്ങള്‍ക്കും ആവശ്യമായ വകയിരുത്തലുകള്‍ ബജറ്റില്‍ ഉള്‍കൊള്ളിച്ചിട്ടുണ്ട്.
പഞ്ചായത്ത് പ്രസിഡന്റ് ശാരദാ എസ് നായര്‍ അധ്യക്ഷയായി. കെ ഇന്ദിര, വി.വി വേലായുധന്‍, ടി ബിന്ദു, സി ശശീധരന്‍, കെ കുമാരന്‍, ശഹീദാ റാഷിദ്, സരോജിനി കൃഷ്ണന്‍, കെ സീത തുടങ്ങിയവര്‍ ചര്‍ച്ചയില്‍ പങ്കെടുത്തു.