ന്യൂഡല്‍ഹി: മണിപ്പൂര്‍ ആസ്ഥാനമായി ദേശീയ കായിക സര്‍വകലാശാല വരുന്നു. ഇതുമായി ബന്ധപ്പെട്ട ഓര്‍ഡിനന്‍സിന് കേന്ദ്ര മന്ത്രിസഭ അംഗീകാരം നല്‍കി. രാഷ്ട്രപതി ഓര്‍ഡിനന്‍സില്‍ ഒപ്പുവച്ചാല്‍ സര്‍വകലാശാല നിലവില്‍ വരുന്നതിന് കാലതാമസമുണ്ടാകില്ലെന്നും ഇതിനായുള്ള ഭൂമി മണിപ്പൂര്‍ സര്‍ക്കാര്‍ നേരത്തെ തന്നെ നീക്കിവച്ചിട്ടുണ്ടെന്നും കേന്ദ്ര നിയമ മന്ത്രി രവി ശങ്കര്‍ പ്രസാദ് പറഞ്ഞു. കായിക സര്‍വകലാശാല ബില്‍ 2017 ഓഗസ്റ്റില്‍ ലോക്‌സഭയില്‍ അവതരിപ്പിച്ചിരുന്നു. 2014-15 കാലത്ത് അവതരിപ്പിച്ച കേന്ദ്ര ബജറ്റില്‍ മണിപ്പൂരിന് കായിക സര്‍വകലാശാല അനുവദിക്കുമെന്നും അതിനായി 100 കോടി നല്‍കുമെന്നും പ്രഖ്യാപനവുമുണ്ടായിരുന്നു.