നെയ്യാറ്റിന്‍കര: നെയ്യാറ്റിന്‍കര ടൗണില്‍ ഇന്നലെ രാവിലെ മുതല്‍ ശക്തമായ ഗതാഗത കുരുക്ക് അനുഭവപ്പെട്ടു. കാളിപ്പാറ കുടിവെളള പദ്ധതിയുമായി ബന്ധപ്പെട്ട് ആലുംമൂട് ജങ്ഷനില്‍ വെട്ടിക്കുഴിച്ച റോഡിന്റെ പണി നാട്ടുകാരുടെയും സൂമൂഹിക പ്രവര്‍ത്തകരുടെയും പ്രതിഷേധത്തെ തുടര്‍ന്ന് കഴിഞ്ഞദിവസം രാത്രി മുതല്‍ ആരംഭിച്ചിരുന്നു. എന്നാല്‍ പണി രാത്രിയില്‍ മാത്രമേ നടത്തുകയുള്ളുവെന്നായിരുന്നു വാട്ടര്‍ അതോറിറ്റി അധികൃതര്‍ അറിയിച്ചിരുന്നത്. എന്നാല്‍ ഇന്നലെ പകല്‍ സമയത്തും പണി തുടര്‍ന്നതാണ് ഗതാഗത തടസമുണ്ടാകാനുളള പ്രധാന കാരണം.
വാഹനങ്ങള്‍ തോന്നും പ്രകാരം മുടുക്കുകള്‍ വഴിയും ഇട റോഡുകള്‍ വഴിയും തിരിഞ്ഞു പോയത് കാല്‍നാട യാത്ര പോലും തടസപ്പെടുത്തി. എന്നാല്‍ വാഹനങ്ങളെ നിയന്ത്രിക്കാന്‍ പൊലിസിന്റെ ഭാഗത്തുനിന്ന് വേണ്ട നടപടികള്‍ ലഭ്യമാകാത്തത് ശക്തമായ പരാതിയ്ക്ക് ഇടയാക്കി.
റോഡ് വെട്ടി പൊളിച്ച് മാസങ്ങള്‍ കഴിഞ്ഞിട്ടും പണി ചെയ്യാത്തതിനാല്‍ തുടര്‍ന്ന് പെയ്യുന്ന മഴയില്‍ വെള്ളം കെട്ടി ജനം ജീവിധം ദുസഹമായി മാറിയ സാഹചര്യത്തിലാണ് കഴിഞ്ഞദിവസം നാട്ടുകാരുടെയും വ്യാപാരികളുടെയും നേതൃത്വത്തില്‍ ചെളിയില്‍ കിടന്ന് പ്രതിഷേധം നടത്തിയത്. നിരവധി സ്‌കൂളുകള്‍ പ്രവര്‍ത്തിക്കുന്ന ആലുംമൂട് കോണ്‍വെന്റ് റോഡിലേയ്ക്കുളള തുടക്കഭാഗത്താണ് റോഡ് വെട്ടി പൊളിച്ച് കുളമാക്കി മാറ്റിയത്.