കോഴിക്കോട്: അണ്ടര്‍ 18 ഐ ലീഗ് പോരാട്ടത്തില്‍ കേരള ബ്ലാസ്റ്റേഴ്‌സ് ഫൈനലില്‍. ഒന്നാം സെമിയില്‍ സായ് കൊല്‍ക്കത്തയെ ഒന്നിനെതിരേ രണ്ട് ഗോളുകള്‍ക്ക് തകര്‍ത്താണ് ബ്ലാസ്റ്റേഴ്‌സ് യുവ ടീമിന്റെ മുന്നേറ്റം. ഷില്ലോങ് ലജോങ് ടീമാണ് ഫൈനലില്‍ ബ്ലാസ്റ്റേഴ്‌സിന്റെ എതിരാളികള്‍. രണ്ടാം സെമി പോരാട്ടത്തില്‍ ഈസ്റ്റ് ബംഗാളിനെ മറുപടിയില്ലാത്ത രണ്ട് ഗോളുകള്‍ക്ക് വീഴ്ത്തിയാണ് ഷില്ലോങ് ലജോങ് ഫൈനല്‍ ബര്‍ത്ത് ഉറപ്പിച്ചത്.
ആന്‍സലോട്ടി
നാപോളി കോച്ച്
മിലാന്‍: കാര്‍ലോ ആന്‍സലോട്ടി ഇറ്റാലിയന്‍ സീരി എ ടീം നാപോളിയുടെ പുതിയ പരിശീലകന്‍. മൂന്ന് വര്‍ഷത്തെ കരാറിലാണ് നാപോളി ഇറ്റലിക്കാരനായ പരിശീലകനെ കോച്ചായി നിയമിച്ചത്. എ.സി മിലാനെ രണ്ട് തവണ ചാംപ്യന്‍സ് ലീഗ് കിരീടത്തിലേക്ക് നയിച്ച ആന്‍സലോട്ടി നേരത്തെ യുവന്റസ്, പാരിസ് സെന്റ് ജെര്‍മെയ്ന്‍, റയല്‍ മാഡ്രിഡ്, ചെല്‍സി, ബയേണ്‍ മ്യൂണിക്ക് ടീമുകളേയും പരിശീലിപ്പിച്ചിട്ടുണ്ട്. ഈ സീസണില്‍ നാപോളിയെ യുവന്റസിന് പിന്നില്‍ രണ്ടാം സ്ഥാനത്തെത്തിച്ച് അവര്‍ക്ക് ചാംപ്യന്‍സ് ലീഗ് യോഗ്യത നേടിക്കൊടുത്ത മൗറീസിയോ സിരിയുടെ കാലാവധി തീര്‍ന്നതിനെ തുടര്‍ന്നാണ് ആന്‍സലോട്ടിയുടെ നിയമനം.
നേരത്തെ ടീമിന്റെ മോശം പ്രകടനത്തെ തുടര്‍ന്ന് കഴിഞ്ഞ സെപ്റ്റംബറില്‍ ജര്‍മന്‍ ടീം ബയേണ്‍ മ്യൂണിക്ക് ആന്‍സലോട്ടിയെ പുറത്താക്കിയിരുന്നു. നിലവില്‍ ഒരു ടീമിനേയും ആന്‍സലോട്ടി പരിശീലിപ്പിക്കുന്നില്ല. നാപോളി വിട്ട മൗറീസിയോ സിരിയെ ഇംഗ്ലീഷ് പ്രീമിയര്‍ ലീഗ് കരുത്തരായ ചെല്‍സി നോട്ടമിട്ടതായി റിപ്പോര്‍ട്ടുകളുണ്ട്.