കാക്കനാട്: സിവില്‍ സ്റ്റേഷന്‍ വളപ്പില്‍ സൂക്ഷിച്ചിരുന്ന ജില്ലാ ലേബര്‍ ഓഫിസറുടെ ഔദ്യോഗിക വാഹനമായ ജീപ്പില്‍ നിന്നും ബാറ്ററി മോഷണം പോയി. ബുധനാഴ്ച രാത്രിയിലായിരുന്നു മോഷണം. ഇന്നലെ രാവിലെ ലേബര്‍ ഓഫിസര്‍ എം.വി ഷീല ഔദ്യോഗിക ആവശ്യങ്ങള്‍ക്ക് പുറത്തുപോകുന്നതിന് മുന്നോടിയായി ഡ്രൈവര്‍ പാര്‍ക്കിങ് സ്ഥലത്ത് നിന്ന് ജീപ്പ് പുറത്തെടുക്കാന്‍ ശ്രമിച്ചപ്പോഴാണ് മോഷണം വിവരമറിയുന്നത്. അടുത്തിടെ വാങ്ങിയ പുതിയ ബാറ്ററിയാണ് കവര്‍ന്നതെന്ന് ലേബര്‍ ഓഫിസ് അധികൃതര്‍ പറഞ്ഞു.
ജില്ലാ ട്രഷറി ഉള്‍പ്പെടെയുള്ള ഓഫിസുകള്‍ക്ക് സമീപം പാര്‍ക്ക് ചെയ്തിരുന്ന ജീപ്പിലാണ് മേഷണം. ആഴ്ചകള്‍ക്ക് മുന്‍പ് കലക്ടറേറ്റ് വളപ്പില്‍ കുടുംബശ്രീ വനിതകള്‍ നടത്തുന്ന ചായക്കടയില്‍ നിന്ന് കുറെ ഭക്ഷണ സാധനങ്ങളും മോഷണം പോയിരുന്നു. മതില്‍ ചാടി കടന്നു മോഷ്ടാവ് കുപ്പിവെള്ളവും മറ്റും സാധനങ്ങളും അടിച്ചുമാറ്റുന്ന ദൃശ്യങ്ങള്‍ കലക്ടറേറ്റ് കെട്ടിടത്തില്‍ സ്ഥാപിച്ച കാമറയില്‍ പതിഞ്ഞിരുന്നെങ്കിലും മോഷ്ടാവിന്റെ മുഖം വ്യക്തമല്ലായിരുന്നു.