മാഡ്രിഡ്: ഇതിഹാസ താരം യോഹാന്‍ ക്രൈഫിന്റെ സ്മരണ നിലനിര്‍ത്താന്‍ ബാഴ്‌സലോണ ഒരുങ്ങുന്നു. ക്ലബിന്റെ ഇതിഹാസ താരമായിരുന്ന ക്രൈഫിന്റെ പ്രതിമയും പുതിയ സ്റ്റേഡിയത്തിനു അദ്ദേഹത്തിന്റെ പേരു നല്‍കുന്നതുള്‍പ്പെടെയുള്ള സ്മാരകങ്ങള്‍ ഒരുക്കാനാണു അധികൃതര്‍ നീക്കം നടത്തുന്നത്. പുതിയതായി നിര്‍മിക്കാനൊരുങ്ങുന്ന പരിശീലന സ്റ്റേഡിയത്തിനായിരിക്കും ക്രൈഫിന്റെ പേര് നല്‍കുക. കഴിഞ്ഞ വര്‍ഷമാണു ക്രൈഫ് ജീവിതത്തിനോടു വിട പറഞ്ഞത്. ബാഴ്‌സലോണയ്ക്കായി അഞ്ചു വര്‍ഷം കളത്തിലിറങ്ങിയ ക്രൈഫ് എട്ടു വര്‍ഷം ടീമിന്റെ പരിശീലകനുമായിരുന്നു. ഹോളണ്ടിന്റെ വിഖ്യാതമായ ടോട്ടല്‍ ഫുട്‌ബോളിന്റെ ഉപജ്ഞാതാവായിരുന്നു അദ്ദേഹം.