എടച്ചേരി: സമീപ പ്രദേശങ്ങളില്‍ നിപാ വൈറസിന്റെ ഭീതി പടര്‍ന്നുപിടിച്ചതോടെ എടച്ചേരിയില്‍ ശുചീകരണ പ്രവൃത്തികള്‍ നടത്തി. എടച്ചേരി പഞ്ചായത്ത് ഭരണസമിതിയുടെ നേതൃത്വത്തില്‍ പുതിയങ്ങാടിയിലും ഇരിങ്ങണ്ണൂരിലുമാണ് ശുചീകരണം നടത്തിയത്.
രാവിലെ മുതല്‍ ഉച്ചവരെ കടകളടച്ചാണ് രണ്ടിടങ്ങളിലും ശുചീകരണം നടത്തിയത്. വ്യാപാരികളും, ജനപ്രതിനിധികളും, ആശാ വര്‍ക്കര്‍മാരും, തൊഴിലുറപ്പ് തൊഴിലാളികളും ചേര്‍ന്നാണ് ഇരു ടൗണുകളിലും അടിഞ്ഞുകൂടിയ പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ നീക്കം ചെയ്തത്.
പുതിയങ്ങാടി മത്സ്യ മാര്‍ക്കറ്റിന്റെയും ഇറച്ചിക്കടയുടെയും പരിസരം ചീഞ്ഞുനാറുന്നതായി കഴിഞ്ഞ ദിവസം സുപ്രഭാതം റിപ്പോര്‍ട്ട് ചെയ്തിരുന്നു. മത്സ്യ വ്യാപാരികളും, കോഴി ഇറച്ചിക്കച്ചവടക്കാരുടെയും അശ്രദ്ധയാണ് ഇവിടെ കൂടുതല്‍ മലിനമാക്കുന്നതെന്ന് പ്രസിഡന്റ് ടി.കെ അരവിന്ദാക്ഷന്‍ പറഞ്ഞു. മാര്‍ക്കറ്റും, പരിസരവും വൃത്തിയായി സൂക്ഷിക്കാന്‍ ഇവര്‍ക്ക് പല തവണ നിര്‍ദേശം നല്‍കിയതാണെന്നും ഇവിടം മലിനമാകാതെ സൂക്ഷിക്കാത്ത പക്ഷം കച്ചവടത്തിനുള്ള ലൈസന്‍സ് റദ്ദാക്കേണ്ടി വരുമെന്നും പ്രസിഡന്റ് സുപ്രഭാതത്തോട് പറഞ്ഞു. ശുചീകരണ പ്രവൃത്തി എടച്ചേരി പഞ്ചായത്ത് പ്രസിഡന്റ് ടി.കെ അരവിന്ദാക്ഷന്‍ ഉദ്ഘാടനം ചെയ്തു. വാര്‍ഡ് മെംബര്‍മാരായ പാച്ചാക്കര ഗംഗാധരന്‍, ടി.പി പുരുഷു, ഹെല്‍ത്ത് ഇന്‍സ്പക്ടര്‍ വി.പി സജീവന്‍, ജൂനിയര്‍ എച്ച്.ഐമാരായ വി.എം ബിജു, രാജേഷ് ടി.വി എന്നിവര്‍ ഇരിങ്ങണ്ണൂരിലും, വൈസ് പ്രസിഡന്റ് ഷൈനി, വാര്‍ഡ് മെംബര്‍മാരായ ടി.കെ മോട്ടി, ഗംഗാധരന്‍ മാസ്റ്റര്‍ പുതിയങ്ങാടി ടൗണിലും നേതൃത്വം നല്‍കി.