കോഴിക്കോട്: നിപാ വൈറസ് ബാധയെ തുടര്‍ന്നുള്ള ജനങ്ങളുടെ ഭീതി അകറ്റുന്നതിന് തദ്ദേശ സ്വയംഭരണ സ്ഥാപന പ്രതിനിധികളുടെ നേതൃത്വത്തില്‍ പ്രവര്‍ത്തനങ്ങള്‍ സംഘടിപ്പിക്കാന്‍ അവലോകന യോഗത്തില്‍ ജില്ലാ പഞ്ചായത്ത് പ്രസിഡന്റ്് ബാബു പറശ്ശേരി നിര്‍ദേശിച്ചു.
വടകരയിലെ ജില്ലാ ആശുപത്രിയില്‍ രോഗപ്രതിരോധ പ്രവര്‍ത്തനത്തിനായി എല്ലാ സജ്ജീകരണങ്ങളും ഒരുക്കിയതായി പ്രസിഡന്റ് യോഗത്തില്‍ അറിയിച്ചു. സ്‌കൂളുകള്‍ തുറക്കാനിരിക്കുന്ന സാഹചര്യത്തില്‍ സ്‌കൂള്‍ കിണറുകള്‍ ശുചീകരിക്കാനും ക്ലോറിനേഷന്‍ നടത്താനും കിണറുകള്‍ക്ക് നെറ്റുകള്‍ സ്ഥാപിക്കാനും തീരുമാനമായി. പ്രതിരോധ പ്രവര്‍ത്തനങ്ങള്‍ക്കായി എച്ച്.എം.സി, എന്‍.എച്ച്.എം, ശുചിത്വമിഷന്‍ വഴി ലഭിക്കുന്ന ഫണ്ടുപയോഗിച്ച് കൈയുറ, മാസ്‌ക് എന്നിവ ആശുപത്രികളില്‍ ലഭ്യമാക്കണമെന്നും യോഗം നിര്‍ദേശിച്ചു. നിപാ രോഗബാധ നിയന്ത്രണവിധേയമാക്കാന്‍ കഴിഞ്ഞതായും യോഗം വിലയിരുത്തി.
വൈസ് പ്രസിഡന്റ് റീന മുണ്ടേങ്ങാട്ട്, ആരോഗ്യ വിദ്യാഭ്യാസ സ്റ്റാന്റിങ്് കമ്മിറ്റി ചെയര്‍മാന്‍ മുക്കം മുഹമ്മദ്, മെംബര്‍മാരായ ആര്‍. ബാലറാം, ശ്രീജ പുല്ലരിക്കല്‍, സെക്രട്ടറി പി.ഡി ഫിലിപ്പ്, ഡോ. എസ്.എന്‍ രവികുമാര്‍ (എ.ഡി.എം.ഒ), ഡോ.ശ്രീകുമാര്‍ (ഡി.എം.ഒ ആയുര്‍വേദം), ഡോ.അബ്ദുല്‍ സലീം, (ഡി.എം.ഒ ഹോമിയോ), ജില്ലാ വിദ്യാഭ്യാസ ഉപഡയറക്ടര്‍ സുരേഷ്‌കുമാര്‍ പങ്കെടുത്തു.