വിശുദ്ധ ഖുര്‍ആന്‍ അവതീര്‍ണമായ മാസമാണ് റമദാന്‍. വ്രതവിശുദ്ധിയോടെ ഖുര്‍ആന്‍ പാരായണം ചെയ്യുന്നതും മനഃപാഠമാക്കുന്നതും ഏറെ പ്രാധാനമാണ്. മദ്‌റസയില്‍ അധ്യയന വര്‍ഷം അവസാനിച്ച ശേഷം റമദാനില്‍ ഒരു മാസം നീളുന്ന ഖുര്‍ആന്‍ പാരായണ ക്ലാസുകള്‍ നടന്നുവരുന്നുണ്ട്.
ഒന്നോ രണ്ടോ അധ്യാപകരുടെ മേല്‍നോട്ടത്തിലാണ് ക്ലാസ്. മദ്‌റസാധ്യാപകരുടെ സംഘടനയായ സമസ്ത കേരളാ ജംഇയ്യത്തുല്‍ മുഅല്ലിമീന്റെ മലപ്പുറം ഈസ്റ്റ് ജില്ലാ കമ്മിറ്റി ഈ വര്‍ഷം റെയിഞ്ചുതലങ്ങളില്‍ പൊതുജനങ്ങള്‍ക്കു ഖുര്‍ആന്‍ പാരായണ പരിശീലന പരിപാടിയും നടത്തുന്നുണ്ട്. രണ്ടു മണിക്കൂര്‍ വീതം പത്തു ദിവസമാണ് കോഴ്‌സ്. എഴുപതോളം കേന്ദ്രങ്ങളില്‍ ക്ലാസുകള്‍ നടന്നുവരുന്നുണ്ട്.
മദ്‌റസാ വിദ്യാര്‍ഥികള്‍ക്കായി സമസ്ത കേരളാ സുന്നീ ബാലവേദി മലപ്പുറം ഈസ്റ്റ് ജില്ലാ കമ്മിറ്റി ഖിറാഅത്ത് ഗ്രാന്‍ഡ് ഫിനാലെയും നടത്തി. ഇന്നലെ മലപ്പുറത്തു നടന്ന പരിപാടിയില്‍ 69 റെയിഞ്ചുകളിലും എട്ടു മേഖലകളിലും നടന്ന മത്സരത്തിലൂടെ തെരഞ്ഞെടുക്കപ്പെട്ട 16 പേരാണ് മത്സരിച്ചത്. രണ്ടു റൗണ്ടുകളിലായി നടന്ന മത്സരത്തിലൂടെയാണ് ജേതാക്കളെ കണ്ടെത്തിയത്. പി. മുഹമ്മദ് മുസമ്മില്‍, പി. മുഹ്‌സിന്‍ (ഇഹ്‌യാഉല്‍ ഉലൂം മദ്‌റസ പഴമള്ളൂര്‍, കുറുവ റെയിഞ്ച്) എന്നിവര്‍ ഒന്നും രണ്ടും സ്ഥാനം നേടി. കെ.കെ മുഹമ്മദ് സ്വദഖത്തുല്ലാഹ് ( മുനവ്വിറുല്‍ ഇസ്‌ലാം മദ്‌റസ വെട്ടത്തൂര്‍, വെട്ടത്തൂര്‍ റെയിഞ്ച്), ടി. മുഹമ്മദ് നബീല്‍ (ഹിദായത്തുല്‍ മുതഅല്ലിമീന്‍ മദ്‌റസ മണലായ, പെരിന്തല്‍മണ്ണ റെയിഞ്ച്) എന്നിവര്‍ മൂന്നാം സ്ഥാനം നേടി.
ഹാഫിള് സയ്യിദ് മിയാസലി ശിഹാബ് തങ്ങള്‍ പാണക്കാട് ഉദ്ഘാടനം ചെയ്തു. ഹാഫിള് മുസവ്വില്‍ ജൈഹൂന്‍ ഷാര്‍ജ മുഖ്യാതിഥിയായി. കെ.ടി ഹുസൈന്‍ കുട്ടി മുസ്‌ലിയാര്‍ അധ്യക്ഷനായി. സയ്യിദ് ബി.എസ്.കെ തങ്ങള്‍, മുജീബ് ജൈഹൂന്‍ ഷാര്‍ജ, ശമീര്‍ ഫൈസി ഒടമല, എന്‍.ടി.സി മജീദ്, അഫ്‌സല്‍ രാമന്തളി, മുസ്തഫ അന്‍വരി, അലവിക്കുട്ടി ഫൈസി, സയ്യിദ് സ്വദഖത്തുല്ലാഹ് തങ്ങള്‍, അസ്‌ലഹ് മുതുവല്ലൂര്‍, മുബാറക് കൊട്ടപ്പുറം, നിയാസ് അഹ്മദ്,നിസാര്‍ വിളയില്‍, സലീഖ് പട്ടര്‍കുളം, നബീല്‍ എടക്കര, നാഫിഅ് ഏലംകുളം, ഫസലുദ്ദീന്‍ കരുളായി സംസാരിച്ചു. സഫറുദ്ധീന്‍ പൂക്കോട്ടൂര്‍ മത്സരത്തിനു നേതൃത്വം നല്‍കി.