ദുബൈ: സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് അല്‍ മക്തൂമിനെ സന്ദര്‍ശിച്ചു. യു.എ.ഇ പ്രസിഡന്റ് ശൈഖ് ഖലീഫാ ബിന്‍ സായിദ് അല്‍ നഹ്‌യാന്റെ റമദാന്‍ അതിഥിയായി യു.എ.ഇ യില്‍ എത്തിയതാണ് ജിഫ്‌രി തങ്ങള്‍.
ദുബൈ ഭരണാധികാരിയുടെ കൊട്ടാരമായ സബീല്‍ പാലസില്‍ വച്ചാണ് ശൈഖ് മുഹമ്മദ്, സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളെ സ്വീകരിച്ചത്.
ദുബൈ കിരീടാവകാശിയും ദുബൈ എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമും സന്നിഹിതനായിരുന്നു. ദുബൈ ഭരണാധികാരി ഒരുക്കിയ നോമ്പ് തുറ സല്‍ക്കാരത്തിലും ജിഫ്‌രി തങ്ങള്‍ പങ്കെടുത്തു.
ഈ മാസം പതിനാറിന് യു.എ.ഇ പ്രസിഡന്റിന്റെ അതിഥിയായി എത്തിയ അദ്ദേഹം അടുത്ത മാസം നാല് വരെ യു.എ.ഇ യിലെ വിവിധ ഭാഗങ്ങളില്‍ നടക്കുന്ന റമദാന്‍ പ്രഭാഷണ പരിപാടികളില്‍ സംബന്ധിക്കും.