കളമശേരി: ചികിത്സ കിട്ടാതെ രോഗി മരിച്ചെന്ന് ആരോപിച്ച് എറണാകുളം ഗവ. മെഡിക്കല്‍ കോളജില്‍ ബഹളം.
എടത്തല തേവക്കല്‍ കൈലാസ് കോളനി മുക്കോമുറിയില്‍ ജെറിന്‍ മൈക്കിള്‍(25) ആണ് മരിച്ചത്. ശനിയാഴ്ച രാവിലെ 7.15ന് വയറുവേദനയെ തുടര്‍ന്നാണ് ജെറിയെ ആശുപത്രിയില്‍ എത്തിച്ചത്. ഉച്ചയ്ക്ക് 12.30 ഓടെ കുത്തിവയ്പ്പ് നല്‍കിയതായും പിന്നീട് ഐ.സി.യുവില്‍ പ്രവേശിപ്പിച്ച ജെറി രാത്രി 11.20ഓടെ മരിച്ചതായി ബന്ധുക്കളെ അറിയിക്കുകയായിരുന്നുവെന്നുമാണ് പരാതി.
വിവിധ ബഹുജന സംഘടനകളും പ്രതിഷേധവുമായി ആശുപത്രിക്ക് സമീപമെത്തി. പ്രതിഷേധം ശക്തമായതിനെ തുടര്‍ന്ന് കലക്ടര്‍ സ്ഥലത്തെത്തി ചര്‍ച്ച നടത്തിയതിനെ തുടര്‍ന്നാണ് പ്രതിഷേധക്കാര്‍ പിരിഞ്ഞുപോയത്.
ബന്ധുക്കളുടെ ആവശ്യത്തെ തുടര്‍ന്ന് മൃതദേഹം പോസ്റ്റ്‌മോര്‍ട്ടത്തിനായി ആലപ്പുഴ മെഡിക്കല്‍ കോളേജിലേക്ക് കൊണ്ടുപോയി.