ന്യൂഡല്‍ഹി: ഒരിടവേളയ്ക്ക് ശേഷം പൗരത്വ ഭേദഗതി നിയമം സുപ്രിംകോടതി വീണ്ടും പരിഗണിക്കുന്നു. പൗരത്വനിയമഭേദഗതിയെ ചോദ്യം ചെയ്തുള്ള ഹരജികളില്‍ സുപ്രിംകോടതി മെയ് അഞ്ചുമുതല്‍ വാദം കേള്‍ക്കും. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മല്യ ബാഗ്ചി, വിപുല്‍ പഞ്ചോലി എന്നിവരടങ്ങിയ ബെഞ്ചാണ് വാദം കേള്‍ക്കുക. 

2024 മാര്‍ച്ച് 19നായിരുന്നു ഹരജി അവസാനമായി ലിസ്റ്റ് ചെയ്തത്. ഏഴു വര്‍ഷം മുമ്പ് നല്‍കിയ ഹരജികളില്‍ രണ്ടുവര്‍ഷത്തിന് ശേഷമാണ് കോടതി കേസ് പരിഗണിക്കുന്നത്. 

പൗരത്വനിയമത്തിലെ 6എയുമായി ബന്ധപ്പെട്ട വിഷയം കൂടിയുള്ളതിനാല്‍ അസം അടക്കമുള്ള വടക്കു കിഴക്കന്‍ സംസ്ഥാനങ്ങളില്‍ നിന്നുള്ള ഹരജികള്‍ പ്രത്യേകം വാദം കേള്‍ക്കണമെന്ന്  മുതിര്‍ന്ന അഭിഭാഷക ഇന്ദിരാ ജയ്സിങ് ആവശ്യപ്പെട്ടു. 

2020 ജനുവരിയില്‍ പുറപ്പെടുവിച്ച ഉത്തരവിന്റെ അടിസ്ഥാനത്തില്‍ അസം, ത്രിപുര സംസ്ഥാനങ്ങളില്‍ നിന്നുള്ള ഹരജികള്‍ രാജ്യത്തിന്റെ മറ്റുഭാഗങ്ങളില്‍ നിന്നുള്ള ഹരജികളില്‍ നിന്ന് വേര്‍പെടുത്തിയതായി സോളിസിറ്റര്‍ ജനറല്‍ തുഷാര്‍ മേത്ത അറിയിക്കുകയും പ്രധാന ഹരജികളില്‍ ആദ്യം വാദം കേള്‍ക്കാമെന്നും അസമും ത്രിപുരയും പിന്നാലെ കേള്‍ക്കുമെന്നും ചീഫ് ജസ്റ്റിസ് അറിയിച്ചു. 

ALSO READ: ഒഡീഷയിൽ ദലിത് ഗ്രാമത്തിന് നേരെ വിവേചനം; കുടിവെള്ളവും വൈദ്യുതിയും വിച്ഛേദിച്ചതായി പരാതി.

മെയ് അഞ്ചിനും ആറിന് രാവിലെയും ഹരജിക്കാരുടെ വാദം കേള്‍ക്കും. എതിര്‍വാദം ആറിന് ബാക്കിയുള്ള സമയവും ഏഴിനും കേള്‍ക്കും. മെയ് 12 വരെ മറുവാദങ്ങള്‍ എഴുതി സമര്‍പ്പിക്കാമെന്നും ചീഫ് ജസ്റ്റിസ് അറിയിച്ചു. 

2014 ഡിസംബര്‍ 31 ന് മുമ്പ് പാകിസ്താന്‍, ബംഗ്ലാദേശ്, അഫ്ഗാനിസ്താന്‍ എന്നിവിടങ്ങളില്‍ നിന്ന് ഇന്ത്യയിലേക്ക് കുടിയേറിയ മുസ് ലിംകളല്ലാത്തവര്‍ക്ക് പൗരത്വം നേടാനുള്ള വ്യവസ്ഥകളില്‍ ഇളവ് നല്‍കുന്നതാണ് ഭേദഗതി. 2019ലാണ് ഭേദഗതി കൊണ്ടുവരുന്നത്. സമസ്ത കേരള ജംഇയ്യത്തുല്‍ ഉലമ, ഇന്ത്യന്‍ യൂണിയന്‍ മുസ് ലിം ലീഗ് തുടങ്ങി നിരവധി സംഘടനകളും വ്യക്തികളും ഭേദഗതിയെ ചോദ്യം ചെയ്ത് ഹരജി സമര്‍ച്ചിട്ടുണ്ട്. കേരളവും സി.എ.എയ്‌ക്കെതിരെ ഹരജി നല്‍കിയിട്ടുണ്ട്.