പൊന്നാനി: കാലവര്‍ഷം ശക്തി പ്രാപിച്ചതോടെ തീരദേശത്ത് കടലേറ്റം ശക്തമായി. പാലപ്പെട്ടി, അജ്മീര്‍ നഗര്‍, മുറിഞ്ഞഴി, ലൈറ്റ് ഹൗസ്, മൈലാഞ്ചിക്കാട്, പുതുപൊന്നാനി എന്നിവിടങ്ങളിലാണ് ഇന്നലെയും കടലാക്രമണം ശക്തമായത്.
പാലപ്പെട്ടിയിലും കായിരിക്കാടും അഞ്ചു വീടുകളിലേക്ക് വെള്ളം കയറി. കാപ്പിരിക്കാട് കടപ്പുറത്ത് തെക്കേപുറത്ത് ബീവാത്തു, തെക്കന്‍ മുഹമ്മദ്, രായീന്‍ മരക്കാര്‍വീട്ടില്‍ മുഹമ്മദ് എന്നിവരുടെ വീടുകളിലും പലപ്പെട്ടി കടപ്പുറത്തെ കോയ, അയമു എന്നിവരുടെ വീടുകളിലേക്കുമാണു വെള്ളം കയറിയത്. ശക്തമായ കടലാക്രമണത്തിലാണ് ഇവരുടെ വീടുകളിലേക്ക് വെള്ളം കയറിയത്. ഇവര്‍ ബന്ധുവീടുകളിലേക്ക് താമസം മാറി. കാപ്പിരിക്കാട് മുതല്‍ പൊന്നാനി വരെയുള്ള തീരത്ത് മുപ്പതോളം തെങ്ങുകളും കടപുഴകിയിട്ടുണ്ട്.
വന്‍തിരമാലകളടിച്ച് കയറിയതോടെ 200 മീറ്റലിലധികം കര കടലെടുത്തു. കടല്‍ഭിത്തിയില്ലാത്ത അജ്മീര്‍ നഗര്‍, മൈലാഞ്ചിക്കാട് എന്നിവിടങ്ങളിലാണ് കടല്‍ക്ഷോഭം രൂക്ഷം. നിരവധി തെങ്ങുകള്‍ കടല്‍ക്ഷോഭ ഭീഷണിയിലാണ്. കടല്‍ഭിത്തിയുള്ള മേഖലകളിലും കടല്‍ക്കരയിലേക്ക് ഇരച്ചുകയറുന്നുണ്ട്. അഴിമുഖം മുതല്‍ മരക്കടവ് വരെയാണ് കടലേറ്റം രൂക്ഷമായത്. കടല്‍ഭിത്തിക്കു മുകളിലൂടെ തിര കരയിലേക്ക് കയറി സമീപത്തെ നിരവധി വീടുകള്‍ക്ക് ചുറ്റും വെള്ളക്കെട്ട് ഉണ്ടായിട്ടുണ്ട്. കടലേറ്റത്തില്‍ ജങ്കാര്‍ റോഡ് പൂര്‍ണമായും മണല്‍ മൂടിയ നിലയിലാണ്. ഇവിടെ ഗതാഗതം പോലും അസാധ്യമായ നിലയിലാണ്. ജെ.സി.ബി ഉപയോഗിച്ച് മണല്‍ നീക്കം ചെയ്യാന്‍ ശ്രമിച്ചെങ്കിലും പൂര്‍ണമായും വിജയിച്ചില്ല. കടലേറ്റം മൂലം വീണ്ടും മണല്‍ നിറയുകയാണിവിടെ.