കൊച്ചി: സംസ്ഥാന സര്‍ക്കാരിന്റെ രണ്ടാം വാര്‍ഷികത്തോടനുബന്ധിച്ച് ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പിന്റെ പ്രദര്‍ശന വാഹനം ഫോര്‍ട്ടുകൊച്ചിയില്‍ പര്യടനം ആരംഭിച്ചു. സര്‍ക്കാരിന്റെ വികസന ക്ഷേമ പ്രവര്‍ത്തനങ്ങള്‍ വ്യക്തമാക്കുന്ന ചിത്രങ്ങളും ദൃശ്യാവതരണവും പ്രദര്‍ശന വാഹനത്തില്‍ സൗകര്യമുണ്ട്.
ഫോര്‍ട്ട്‌കൊച്ചി പ്രദര്‍ശനം കാണാന്‍ നിരവധി പേരാണെത്തിയത്. നവകേരള സൃഷ്ടിക്കായുള്ള സര്‍ക്കാരിന്റെ മിഷനുകള്‍ അവതരിപ്പിക്കുന്ന വീഡിയോ വാളും പ്രദര്‍ശന വാഹനത്തോടൊപ്പം സജ്ജീകരിച്ചിട്ടുണ്ട്.
പളളുരുത്തി, കുണ്ടന്നൂര്‍, ഇടപ്പള്ളി, തൃക്കാക്കര നഗരസഭ ബസ് സ്റ്റാന്‍ഡ് പരിസരം എന്നിവിടങ്ങളിലെ പര്യടനത്തിനു ശേഷം കാക്കനാട് എന്‍ജിഒ ക്വാര്‍ട്ടേഴ്‌സ് പരിസരത്ത് പര്യടനം സമാപിച്ചു. സമാപന ദിവസമായ ഇന്ന് രാവിലെ എട്ടിന് കളമശേരിയില്‍ നിന്ന് പര്യടനം ആരംഭിക്കും. തുടര്‍ന്ന് ആലുവ, നെടുമ്പാശ്ശേരി, അങ്കമാലി എന്നിവിടങ്ങളിലും പ്രദര്‍ശന വാഹനം പര്യടനം നടത്തും. വികസന ചിത്രങ്ങളുടെ പ്രദര്‍ശനം, വീഡിയോ ഷോ എന്നിവ ഒരുക്കിയിട്ടുളള പ്രദര്‍ശന വാഹനം സംസ്ഥാന സര്‍ക്കാരിന്റെ വികസനപ്രവര്‍ത്തനങ്ങളുടെ ചിത്രം പകര്‍ന്നുതരും.