കോവളം: മത്സ്യബന്ധനത്തിനിടെ വള്ളങ്ങള്‍ കൂട്ടിയിടിച്ചുണ്ടായ അപകടത്തില്‍ മത്സ്യത്തൊഴിലാളി മരിച്ചു. ഒരാള്‍ക്ക് പരുക്കേറ്റു. കൂടെയുണ്ടായിരുന്ന മറ്റൊരാള്‍  അദ്ഭുതകരമായി രക്ഷപ്പെട്ടു. കോട്ടപ്പുറം ഒസാവിള കരിയിലക്കാട് പുരയിടത്തില്‍ പീറ്റര്‍ (34) ആണ് മരിച്ചത്.ഒപ്പമുണ്ടയിരുന്ന ആരോഗ്യദാസിനെ പരുക്കുകളോടെ വിഴിഞ്ഞം സി.എച്ച്‌സിയില്‍ പ്രവേശിപ്പിച്ചു .സഹപ്രവര്‍ത്തകനായ വര്‍ഗീസാണ് രക്ഷപ്പെട്ടത്.
ഇന്നലെ രാവിലെ ആറു മണിയോടെ വിഴിഞ്ഞം തീരത്തു നിന്ന് 5 നോട്ടിക്കല്‍ മൈല്‍ ഉള്ളില്‍ കടലില്‍ വെച്ചായിരുന്നു അപകടം. പീറ്ററും സുഹൃത്തുക്കളായ ആരോഗ്യ ദാസും വര്‍ഗീസും ഇന്നലെ പുലര്‍ച്ചെ നാലിനാണ് വിഴിഞ്ഞത്തു നിന്ന്  ഫൈബര്‍ വള്ളത്തില്‍ മത്സ്യബന്ധനത്തിന് പോയത്.കടലില്‍ വല വിരിച്ചുകൊണ്ടിരിക്കെ മത്സ്യ ബന്ധനം കഴിഞ്ഞ് മടങ്ങുകയായിരുന്ന മറ്റൊരു സംഘം സഞ്ചരിച്ചിരുന്ന സജിത എന്ന ഫൈബര്‍ ബോട്ട് ഇവരുടെ വള്ളത്തില്‍ ഇടിച്ചു കയറുകയായിരുന്നു.
പീറ്ററിന്റെ സഹോദരന്‍ പത്രോസിന്റെതാണ് അപകടത്തില്‍പ്പെട്ട വള്ളം. ഇടിയേറ്റ് തകര്‍ന്ന വള്ളത്തിനടിയിലായിപ്പോയ പീറ്ററിനെ ഉടന്‍ മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും  രക്ഷിക്കാനായില്ല.പനിയമ്മയാണ് ഭാര്യ. ഗംഗ, ജ്യോതി, രാഖിന്നിവര്‍ മക്കളാണ് പോസ്റ്റുമോര്‍ട്ടത്തിനുശേഷം ബന്ധുക്കള്‍ക്ക് വിട്ടുകൊടുത്ത മൃതദേഹംഇന്നലെ  രാവിലെ 10ന് വിഴിഞ്ഞം പഴയ പള്ളിസെമിത്തോരിയില്‍ സംസ്‌കരിച്ചു. വിഴിഞ്ഞം പൊലിസ് കേസെടുത്തു.