ന്യൂയോര്‍ക്ക്: വാട്‌സാപ്പിനു പിന്നാലെ ഫേസ്ബുക്ക് മെസന്‍ജറിലും ലൈവ് ലൊക്കേഷന്‍ ഷെയറിങ് വന്നു. മെസന്‍ജറില്‍ ചാറ്റ് ചെയ്യുന്നവര്‍ തമ്മില്‍ പലപ്പോഴും നിങ്ങള്‍ എവിടെയാണെന്ന് ചോദിക്കാറുണ്ട്, ഈ ചോദ്യം അവസാനിപ്പിക്കാന്‍ കൂടിയാണ് മെസന്‍ജര്‍ പുതിയ ഫീച്ചര്‍ അവതരിപ്പിച്ചത്.

മെസന്‍ജറിലൂടെ ലൊക്കേഷന്‍ വിവരങ്ങള്‍ നമ്മുടെ സുഹൃത്തുക്കള്‍ നമുക്ക് അയച്ചു തന്നാല്‍ പിന്നീട് ഒരു മണിക്കൂര്‍ വരെ സുഹൃത്തിന്റെ ചലനങ്ങള്‍ നമുക്ക് നിരീക്ഷിക്കാനാവും.

ഫേസ്ബുക്കിന്റെ പ്രധാനപ്പെട്ട മെസേജിങ് ആപ്പാണ് ഫേസ്ബുക്ക് മെസഞ്ചര്‍. ആദ്യം ഫേസ്ബുക്ക് ആപ്പില്‍ തന്നെ ലഭ്യമായിരുന്ന മെസേജിങ് സംവിധാനം 2014ലാണ് ഫേസ്ബുക്ക് പുതിയ ആപ്പിലേക്ക് മാറ്റിയത്. മെക്‌സികോയിലാണ് പുതിയ പരിഷ്‌കാരം ആദ്യമായി അവതരിപ്പിച്ചത്. ഇപ്പോള്‍ ആഗോള തലത്തില്‍ പുതിയ പരിഷ്‌കാരം ലഭ്യമാണ്.