തിരുവനന്തപുരം: വിതുരയില്‍ യുവതിയെ തോക്കുചൂണ്ടി ബലാല്‍സംഗം ചെയ്തതതായി പരാതി. തൊളിക്കോട് തേവന്‍പാറയില്‍ വാടകയ്ക്ക് താമസിക്കുന്ന 28 കാരിയെയാണ് പീഡിപ്പിച്ചത്. തൊളിക്കോട് സ്വദേശിയും നിരവധി ക്രിമിനല്‍ കേസുകളിലെ പ്രതിയുമായ പോത്തുഷാജി എന്ന ഷാജിയാണ് പനവൂര്‍ സ്വദേശിനിയായ യുവതിയെ പീഡിപ്പിച്ചത്.

അവശനിലയിലായ യുവതിയെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ആദ്യ ഭര്‍ത്താവ് മരിച്ച ഇവര്‍ ഒന്‍പതും അഞ്ചും വയസു പ്രായമുള്ള രണ്ടു കുട്ടികളുടെ അമ്മയാണ്. ഒന്നര വര്‍ഷമായി മറ്റൊരാളോടൊപ്പം ഷാജിയുടെ വീട്ടില്‍ വാടകയ്ക്കു താമസിക്കുകയായിരുന്നു.

ഇവരോടൊപ്പം താമസിക്കുന്ന ആളുടെ സുഹൃത്താണ് ഷാജി. കൊലപാതകമുള്‍പ്പടെ നിരവധി ക്രിമിനല്‍ കേസുകളില്‍ പ്രതിയായ ഇയാള്‍ക്കായി പൊലിസ് അന്വേഷണം ആരംഭിച്ചു. വിവിധ സംഭവങ്ങളില്‍ പൊലിസിന്റെ അനാസ്ഥ പുറത്തുവരുന്നതിനിടെയാണ് പീഡന വാര്‍ത്തകള്‍ പുറത്തു വരുന്നത്.