എരുമപ്പെട്ടി: ഇന്നലെ രാത്രിയിലുണ്ടായ ശക്തമായ കാറ്റിലും മഴയിലും പാത്രമംഗലം ആദൂര്‍ മേഖലകളില്‍ വ്യാപക നാശനഷ്ടം. വേലൂര്‍ ഗ്രാമപഞ്ചായത്ത് അംഗം പി.കെ ശ്യാംകുമാറിന്റെ വീടിന് മുകളിലേക്ക് മരം കടപുഴകി വീണ് കേടുപാടുകള്‍ സംഭവിച്ചു. വീടിന് സമീപമുള്ള പറമ്പിലെ വലിയ ഞാവല്‍ മരമാണ് കടപുഴകി വീണത്.
പാണന്‍വീട്ടില്‍ സുനില്‍കുമാറിന്റെ വീടിന് മുകളിലേക്ക് മരത്തിന്റെ വലിയ കൊമ്പ് പൊട്ടിവീണ് കുടിവെള്ള ടാങ്ക് തകര്‍ന്നു. കുന്നത്തേരി വീട്ടില്‍ ശ്രീനിവാസന്റെ വീടിന് മുകളിലേക്ക് തേക്ക്മരം കടപുഴകി വീണ് കേടുപാടുകള്‍ സംഭവിച്ചു.
ആദൂര്‍ കുളങ്ങര അഷറഫിന്റെ വീടിന്റെ മുകളിലേക്ക് തെങ്ങ് കടപുഴകി വീണ് മേല്‍ക്കൂര തകര്‍ന്നു. വീടിന്റെ പിറകുവശത്ത് മേഞ്ഞിരുന്ന ഷീറ്റ് ശമായ കാറ്റില്‍ പറന്നുപോയി. പാത്രമംഗലം, ആദൂര്‍, വെള്ളറക്കാട് പ്രദേശങ്ങളില്‍ കാറ്റില്‍ മരങ്ങള്‍ കടപുഴകി വൈദ്യുതി കമ്പികളില്‍ വീണ് വൈദ്യുതി കാലുകള്‍ ഒടിഞ്ഞ് വീണ് വൈദ്യുതി വിതരണം തടസപ്പെട്ടു. സി.സി.ടി.വി കേബിള്‍ നെറ്റ് വര്‍ക്കിന്റെ കേബിളുകള്‍ മരം വീണ് മുറിഞ്ഞ് പ്രോഗ്രാം സംപ്രേക്ഷണം തടസപ്പെട്ടു.
കുന്നംകുളം: കഴിഞ്ഞ ദിവസത്തെ കാറ്റും മഴയും, കടവല്ലൂരില്‍ വ്യാപക നാശനഷ്ടം. വടക്കുമുറി മേഖലയില്‍ 4 വീടുകള്‍ക്ക് മേല്‍മരം കടപുഴകി വീണ് മേല്‍ക്കൂര തകരുകയും, ചിലയിടത്ത് വൈദ്യുതി കാലുകള്‍ തകര്‍ന്ന് വീഴുകയുമുണ്ടായി.
വടക്കുമുറി തോപ്പില്‍ കിടങ്ങത്ത് വീട്ടില്‍ സാജന്‍പോളിന്റെ വീടിനു മുകളിലേക്ക് 5 ഓളം റബര്‍ മരങ്ങള്‍ വീണ് വീടിന്റെ മേല്‍ക്കൂര ഭാഗികമായി തകര്‍ന്നു. മോഡേണ്‍പറമ്പില്‍ ബാലകൃഷ്ണന്റെ വീടിന്റെ പുറക് വശത്തുള്ള ചായ്പിലേക്ക് തേക്ക്, മാവ് എന്നിവ പൊട്ടിവീണാണ് മേല്‍ക്കൂര തകര്‍ന്നത്.
തൊട്ടടുത്തുള്ള ചന്ദ്രന്റെ വാടിന്റെ മുകള്‍ വശവും മരം വീണ് തകര്‍ന്ന നിലയിലാണ്. നാലകത്ത് ഉമ്മറിന്റെ വീട്ടുപറമ്പിലെ തേക്ക് കടപുഴകി വീണ് വീടിന്റെ മേല്‍ക്കൂര തകര്‍ന്നു. മേഖലയില്‍ പലയിടത്തും മരങ്ങള്‍ വീണ് ചുമരുകളും മറ്റും തകര്‍ന്ന നിലയിലാണ്. എവിടേയും ആളപായമില്ല.