കോഴിക്കോട്: മിഠായിത്തെരുവ് കച്ചവടത്തിന് വിഘാതം സൃഷ്ടിച്ചുകൊണ്ട് വ്യാപാരികളെ ബുദ്ധിമുട്ടിക്കുന്ന തരത്തിലുള്ള കട പരിശോധനയുമായി സഹകരിക്കേണ്ടതില്ലെന്ന് കേരള വ്യാപാരി വ്യവസായി ഏകോപന സമിതി ജില്ലാ സെക്രട്ടേറിയറ്റ് തീരുമാനിച്ചു.
നിയമാനുസൃതം ഓരോ വകുപ്പുകളും പരിശോധിക്കുന്നതിന് വിരോധമില്ല. കംപ്യൂട്ടര്‍ സംവിധാനത്തില്‍ ഡി ആന്‍ഡ് ഒ ലൈസന്‍സ് വാങ്ങിയ കടകളിലും ആയതിന്റെ പേരില്‍ നിരന്തരം പരിശോധന നടത്തുന്നത് ശരിയല്ല.
സുരക്ഷിതത്വത്തിന്റെ പേരില്‍ വ്യാപാരികളെക്കൂടി സഹകരിപ്പിച്ച് പ്രവര്‍ത്തിക്കാന്‍ ഉദ്യോഗസ്ഥര്‍ തയാറാകണമെന്നും യോഗം  അഭിപ്രായപ്പെട്ടു.
പ്രസിഡന്റ് ടി. നസിറുദ്ദീന്‍ അധ്യക്ഷനായി. ജനറല്‍ സെക്രട്ടറി അഷ്‌റഫ് മുത്തേടത്ത് റിപ്പോര്‍ട്ട് അവതരിപ്പിച്ചു.