കൊട്ടാരക്കര: പരാതി അന്വേഷിക്കാനെത്തിയ പൊലിസുകാരന്റെ കണ്ണില്‍ പതിനാറുകാരന്‍ കമ്പി കുത്തിയിറക്കി. കൊട്ടാരക്കര പൊലിസ് സ്റ്റേഷന്റെ കീഴിലുള്ള വാളകം ഔട്ട് പോസ്റ്റിലെ പൊലിസ് ഡ്രൈവര്‍ സന്തോഷ് വര്‍ഗീസിനാണ് പരുക്കേറ്റത്.  സന്തോഷിനെ തിരുവനന്തപുരം കിംസ് ആശുപത്രിയില്‍ പ്രവേശിപ്പിച്ചു. വ്യാഴാഴ്ച രാത്രി 9 ഓടെയായിരുന്നു സംഭവം. വാളകം ഇരണൂര്‍ സ്വദേശിയായ പതിനാറുകാരനാണ് അക്രമം കാട്ടിയത്. അയല്‍വാസിയായ പെണ്‍കുട്ടികളെ ശല്യം ചെയ്യുന്നതായുള്ള പരാതി അന്വേഷിക്കാനാണ് പൊലിസ് സംഘം എത്തിയത്.  

പൊലിസ് എത്തിയപ്പോള്‍ പതിനാറുകാരന്റെ വീട് അടഞ്ഞുകിടക്കുകയായിരുന്നു. ജനലിലെ കര്‍ട്ടന്‍ നീക്കി അകത്തേക്ക് നോക്കിയപ്പോഴാണ് അകത്തുനിന്നും കമ്പികൊണ്ട് സന്തോഷ് വര്‍ഗീസിന്റെ കണ്ണില്‍ കുത്തിയത്. ആഴത്തില്‍ മുറിവേറ്റ സന്തോഷിനെ ഉടന്‍ തന്നെ ആശുപത്രിയിലേക്ക് മാറ്റുകയായിരുന്നു. പതിനാറുകാരനും പിതാവും മാത്രമാണ് വീട്ടിലുണ്ടായിരുന്നത്. മാനസിക അസ്വാസ്ഥ്യം കാട്ടിയതിനെ തുടര്‍ന്ന് പതിനാറുകാരനെ പിന്നീട് ആശുപത്രിയിലേക്ക് മാറ്റി.