കോഴിക്കോട്: നിപാ വൈറസ് ബാധ പകരുന്നതിന്റെ പശ്ചാത്തലത്തില്‍ സമ്പര്‍ക്ക പട്ടിക വിപുലപ്പെടുത്തുന്നു. ആരോഗ്യ വകുപ്പിന്റെ നേതൃത്വത്തില്‍ നടത്തുന്ന പഴുതടച്ച സുരക്ഷയുടെ ഭാഗമായാണ് പുതിയ നടപടി.
മരിച്ചവരും രോഗം സ്ഥിരീകരിച്ചവരുമായി അടുത്തിടപഴകിയവരെ കണ്ടെത്തിയായിരുന്നു ഇത് വരെ പട്ടിക വിപുലപ്പെടുത്തിയിരുന്നത്.
എന്നാല്‍ മരണം അനുദിനം ഉണ്ടാവുന്ന സാഹചര്യത്തില്‍ മെഡിക്കല്‍ കോളജ് സന്ദര്‍ശിച്ചവരെയും കൂടി സമ്പര്‍ക്ക പട്ടികയില്‍ ഉള്‍പെടുത്താനാണ് തീരുമാനം.
കോഴിക്കോട് മെഡിക്കല്‍ കോളജ്, ബാലുശ്ശേരി താലൂക്ക് ആശുപത്രി എന്നിവിടങ്ങളില്‍ ചികിത്സക്കെത്തിയവരെയും കൂട്ടിരിപ്പുകാരെയുമാണ് പട്ടികയുടെ ഭാഗമാക്കുന്നത്.
മെഡിക്കല്‍ കോളജ് അത്യാഹിത വിഭാഗത്തിലും സി.ടി സ്‌കാന്‍ റൂമിലും വെയിറ്റിങ് റൂമിലും മെയ് അഞ്ചിന് രാവിലെ പത്ത് മുതല്‍ വൈകിട്ട് അഞ്ച് വരെയും മെയ് 14 ന് രാത്രി ഏഴ് മുതല്‍ പിറ്റേന്ന് രാവിലെ ഒന്‍പത്് വരെയും ഉള്ളവരെയാണ് പുതിയ ലിസ്റ്റില്‍ ഉള്‍പ്പെടുത്തുന്നത്.
മെയ് 18,19 തിയതികളില്‍ ഉച്ചയ്ക്ക് രണ്ട് മണിവരെ ബാലുശേരി താലൂക്ക് ആശുപത്രിയില്‍ എത്തിയവരെയും ലിസ്റ്റില്‍ ഉള്‍പ്പെടുത്തുന്നുണ്ട്. ഇവര്‍ കോഴിക്കോട് ഗസ്റ്റ് ഹൗസില്‍ പ്രവര്‍ത്തിക്കുന്ന സംസ്ഥാന നിപാ സെല്ലില്‍ ബന്ധപ്പെടേണ്ടതാണ്. ലിസ്റ്റില്‍ ഉള്‍പ്പെടുത്തുന്നവരുടെ വിവരങ്ങള്‍ രഹസ്യമായി സൂക്ഷിക്കാനുള്ള നടപടി സ്വീകരിക്കുമെന്നും അധികൃതര്‍ അറിയിച്ചു.
കഴിഞ്ഞ ദിവസം നിപാ പിടിപെട്ട് മരിച്ച നെല്ലിക്കാപ്പറമ്പ് സ്വദേശി അഖില്‍ (28), കോട്ടൂര്‍ പൂനത്ത് നെല്ലിയുള്ളതില്‍ റസില്‍ (25) എന്നിവരുമായി അടുത്ത് സമ്പര്‍ക്കം പുലര്‍ത്തിയവരും നിപാ സെല്ലുമായി ബന്ധപ്പെടണമെന്ന് ആരോഗ്യവകുപ്പ് അധികൃതര്‍ അറിയിച്ചു.
ഇത്രയും പേരെ കണ്ടെത്താന്‍ സാധിച്ചാല്‍ രോഗവ്യാപനത്തിന്റെ വ്യാപ്തി കുറയ്ക്കാന്‍ കഴിയുമെന്നും ഫലപ്രദമായ പ്രതിരോധ പ്രവര്‍ത്തനങ്ങള്‍ കൈകൊള്ളാനാവുമെന്നുമുള്ള ഉറച്ച പ്രതീക്ഷയിലാണ് ആരോഗ്യ വകുപ്പ്. സമ്പര്‍ക്ക പട്ടികയില്‍ ഇന്നലെ വരെ ഉള്‍പ്പെടുത്തിയവരുടെ എണ്ണം 1407 ആയി.

കോഴിക്കോട് മെഡിക്കല്‍ കോളജ് അത്യാഹിത വിഭാഗത്തിലും സി.ടി സ്‌കാന്‍ റൂമിലും വെയിറ്റിങ് റൂമിലും മെയ് അഞ്ചിന് രാവിലെ പത്ത് മുതല്‍ വൈകിട്ട് അഞ്ച് വരെയും മെയ് 14 ന് രാത്രി ഏഴ് മുതല്‍ പിറ്റേന്ന് രാവിലെ ഒന്‍പത് വരെയും ഉള്ളവരെയാണ് പുതിയ ലിസ്റ്റില്‍ ഉള്‍പ്പെടുത്തുന്നത്
നിപാ സെല്‍ ഫോണ്‍: 0495 - 2381000

കോടതി നടപടികള്‍ നിര്‍ത്തിവെക്കണമെന്ന്
കലക്ടറുടെ റിപ്പോര്‍ട്ട്

കോഴിക്കോട്: നിപാ രോഗ ബാധയുടെ പശ്ചാത്തലത്തില്‍ കോഴിക്കോട് പ്രവര്‍ത്തിക്കുന്ന കോടതികളുടെ നടപടികള്‍ നിര്‍ത്തിവെക്കണമെന്നാവശ്യപ്പെട്ട് കോഴിക്കോട് ജില്ലാ കലക്ടര്‍ യു.വി ജോസ് ഹൈക്കോടതിക്ക് റിപ്പോര്‍ട്ട് നല്‍കി. കഴിഞ്ഞ ദിവസം ജില്ലാ കോടതി സീനിയര്‍ സൂപ്രണ്ട് ടി.പി മധുസൂദനന്‍ മരിച്ചതോടെ കാലിക്കറ്റ് ബാര്‍ അസോസിയേഷന്‍ നല്‍കിയ കത്തിന്റെ അടിസ്ഥാനത്തിലാണ് നടപടി. ന്യായാധിപന്‍മാര്‍ എത്തി സിറ്റിങ് നടത്താതെ കേസുകള്‍ മാറ്റിവെക്കാമെന്നാണ് അസോസിയേഷന്‍ നല്‍കുന്ന നിര്‍ദേശം. കൂടാതെ മധുസൂദനനുമായി അടുത്തിടപഴകിയവരും നിരീക്ഷണത്തിലാണ്.
അതേസമയം നിപ ഭീതിയില്‍ കോടതി ജീവനക്കാര്‍ പലരും അവധിയില്‍ പ്രവേശിച്ചിരിക്കുകയാണ്.