ന്യൂഡല്‍ഹി: ജിഎസ്ടി ബില്ലുമായി ബന്ധപ്പെട്ടു ലോക്‌സഭയിലെ ചര്‍ച്ചയില്‍ ബിജെപിക്കെതിരേ രൂക്ഷവിമര്‍ശനമുന്നയിച്ച് കോണ്‍ഗ്രസ്.

യുപിഎ ഭരണകാലത്ത് ബില്‍ നടപ്പാക്കാന്‍ അനുവദിക്കാതെ വന്‍ നഷ്ടമാണ് അന്നത്തെ പ്രതിപക്ഷം രാജ്യത്തിനു വരുത്തിവച്ചത്. ഒരു വര്‍ഷം 1.5 ലക്ഷം കോടി രൂപ ഖജനാവിനു നഷ്ടമുണ്ടായി. കഴിഞ്ഞ എട്ടുവര്‍ഷത്തെ നഷ്ടം കണക്കാക്കുകയാണെങ്കില്‍ 12 ലക്ഷം കോടിയുടെ നഷ്ടമുണ്ടായതായി കോണ്‍ഗ്രസ് നേതാവ് എം. വീരപ്പമൊയ്‌ലി സഭയില്‍ ആരോപിച്ചു.

വിപ്ലവകരമായ നികുതി പരിഷ്‌കാരമായി ബിജെപി സര്‍ക്കാര്‍ ഉയര്‍ത്തിക്കാട്ടുന്ന ബില്‍ ഒരു വലിയ മാറ്റമൊന്നും ഈ മേഖലയില്‍ കൊണ്ടുവരില്ലെന്നും ഒരു ചെറിയ തുടക്കം മാത്രമാണെന്നും മൊയ്‌ലി പറഞ്ഞു.

ഇപ്പോള്‍ സര്‍ക്കാര്‍ മുന്നോട്ടുവച്ച ബില്‍വ്യവസ്ഥകള്‍ ജനക്ഷേമകരമല്ല. ഇതില്‍ കര്‍ക്കശമായ ഒരുപാട് വ്യവസ്ഥകള്‍ ഉണ്ട്. ഇപ്പോഴത്തെ ബില്‍ ഒരു സാങ്കേതിക ദുസ്വപ്‌നമാണെന്നു മൊയ്‌ലി വിമര്‍ശിച്ചു.

രാഷ്ട്രീയ ചൂതാട്ടത്തിന്റെ ഭാഗമായി ഖജനാവിനുണ്ടായത് വന്‍ സാമ്പത്തിക നഷ്ടമാണ്. ഇത് ആരു നികത്തുമെന്നും മൊയ്‌ലി ചോദിച്ചു.