തൊടുപുഴ: മൂന്നാര്‍ ചിന്നക്കനാല്‍ പാപ്പാത്തിച്ചോലയില്‍ സര്‍ക്കാര്‍ ഭൂമി കൈയേറി കുരിശ് സ്ഥാപിച്ചത് രണ്ടാഴ്ച പിന്നിട്ടിട്ടും നീക്കം ചെയ്യാനായില്ല. അനധികൃത കുരിശ് നീക്കം ചെയ്യാനെത്തിയ ഡെപ്യൂട്ടി തഹസില്‍ദാരെ തടഞ്ഞ സംഭവത്തില്‍ പ്രതികളെ ഇതുവരെ പിടികൂടിയിട്ടില്ല.
വഴിതടസപ്പെടുത്തിയ ജീപ്പ് ഡ്രൈവര്‍ക്കും ഒപ്പം ഉണ്ടായിരുന്ന മറ്റൊരാള്‍ക്കുമെതിരേ ജാമ്യമില്ലാ വകുപ്പ് പ്രകാരം ശാന്തമ്പാറ പൊലിസ് കേസെടുത്തിട്ടുണ്ട്. ഇരുവരെയും തിരിച്ചറിയാനായിട്ടില്ലെന്നാണ് പൊലിസ് ഭാഷ്യം. ഔദ്യോഗിക കൃത്യനിര്‍വഹണം തടസപ്പെടുത്തിയതിനാണ് കേസ് രജിസ്റ്റര്‍ ചെയ്തിരിക്കുന്നത്.
15 അടി ഉയരത്തിലുള്ള പൂര്‍ണമായും കോണ്‍ക്രീറ്റില്‍ തീര്‍ത്ത കൂറ്റന്‍ കുരിശാണ് ഇവിടെ സ്ഥാപിച്ചിരിക്കുന്നത്. കുരിശ് സ്ഥാപിച്ച് ഭൂമി കൈയേറുകയായിരുന്നു ലക്ഷ്യം.
പൊലിസ് സ്ഥലത്തെത്തിയിട്ടും കുരിശ് നീക്കാനാകാതെ വന്നത് പ്രതിഷേധങ്ങള്‍ക്കിടയാക്കിയിരുന്നു. റവന്യു സംഘത്തിന്റെ ജീപ്പും പൊളിക്കാനെത്തിയ മണ്ണുമാന്തി യന്ത്രവും മറ്റൊരു ജീപ്പ് മുന്നിലിട്ട് കൈയേറ്റക്കാര്‍ തടയുകയായിരുന്നു. രണ്ട് മണിക്കൂറോളം ഇത്തരത്തില്‍ വണ്ടി കടന്നുപോകാനാകാതെ കിടന്നു. റവന്യു ഉദ്യോഗസ്ഥര്‍ അറിയിച്ചതിനെ തുടര്‍ന്ന് സ്ഥലത്തെത്തിയ ശാന്തമ്പാറ പൊലിസും വാഹനം മാറ്റാന്‍ ശ്രമിച്ചില്ല.
ആദ്യം എത്തിയ ഇന്‍വേഡര്‍ ജീപ്പ് മുന്നിലിട്ട ശേഷം താക്കോലുമായി ഡ്രൈവര്‍ താഴേക്ക് പോകുകയായിരുന്നു. ഉദ്യോഗസ്ഥര്‍ പിന്തിരിയാന്‍ തയാറാകാതെ വന്നതോടെ സ്ഥലത്തെത്തിയ നെടുങ്കണ്ടം ഡെപ്യൂട്ടി തഹസില്‍ദാര്‍ ഷാജിയെ മന്ത്രി എം.എം മണി നേരിട്ട് വിളിച്ച് പിന്തിരിയാന്‍ ഉത്തരവിടുകയായിരുന്നുവെന്ന് ആക്ഷേപമുണ്ട്.