കാസര്‍കോട്: രണ്ടു മാസത്തെ അവധി ദിനങ്ങള്‍ക്ക് വിടയേകി ജില്ലയിലെ വിദ്യാഭ്യാസ സ്ഥാപനങ്ങള്‍ ഇന്ന് തുറക്കും. കഴിഞ്ഞ ദിവസങ്ങളിലുണ്ടായ ശക്തമായ മഴയ്ക്കും കാറ്റിനും ബുധനാഴ്ചയോടെ ശമനമായിട്ടുണ്ട്. നവാഗതരെ സ്വീകരിക്കാന്‍ ജില്ലയിലെ സര്‍ക്കാര്‍ വിദ്യാലയങ്ങളില്‍ നല്ല ഒരുക്കങ്ങള്‍ തന്നെ നടത്തിയിട്ടുണ്ട്.
അതേ സമയം വിദ്യാലയങ്ങള്‍ തുറക്കുന്നതോടെ രക്ഷിതാക്കളില്‍ പലരും ആശങ്കയിലാണ്. വിദ്യാലയങ്ങള്‍ കേന്ദ്രീകരിച്ച് ലഹരി വസ്തുക്കള്‍ വില്‍പന നടത്തുന്ന സംഘം ജില്ലയിലെ പല വിദ്യാലയ പരിസരങ്ങളിലും സജീവമാണ്.
കഴിഞ്ഞ അധ്യായന വര്‍ഷം ഉദുമ മാങ്ങാട് വേദിക്കുന്നിലെ ജസീം കഞ്ചാവ് ലോബിയുടെ ചതിയില്‍പ്പെട്ടു ദുരൂഹ സാഹചര്യത്തില്‍ മരിച്ചിരുന്നു.
സ്‌കൂള്‍പരീക്ഷകള്‍ കഴിഞ്ഞു സെന്റ് ഓഫ് ചടങ്ങിനു വേണ്ടി ഡ്രസെടുക്കാന്‍ പോകുന്നുവെന്നു പറഞ്ഞു വീട്ടില്‍ നിന്നു പുറത്തിറങ്ങിയ ജസീം സുഹൃത്തുക്കളോടൊപ്പം പോയ ശേഷം നാല് ദിവസത്തോളം കാണാതാവുകയും പിന്നെ കഞ്ചാവ് മാഫിയയില്‍പ്പെട്ട ആളുകള്‍ ഉള്‍പ്പെടെ മൃതദേഹം കാണിച്ചു കൊടുക്കുകയും ചെയ്തിട്ടും ജസീമിന്റെ മരണത്തിലെ ദുരൂഹത മാറ്റാന്‍ പൊലിസിനു കഴിഞ്ഞിട്ടില്ല.
ഒരു വിദ്യാര്‍ഥിയെ റെയില്‍വേ ട്രാക്കിനു സമീപം ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തുകയും പ്രസ്തുത വിദ്യാര്‍ഥിയുടെ കൂടെയുണ്ടായിരുന്നവര്‍ മൂന്നു ദിവസത്തിനു ശേഷം മൃതദേഹം കാണിച്ചു കൊടുത്തിട്ടും വിദ്യാര്‍ഥിയുടെ മരണം ഇപ്പോഴും ദുരൂഹമായി തന്നെ തുടരുകയാണ്.
അതേ സമയം, ജില്ലയിലെ പല വിദ്യാലയങ്ങളിലും പെണ്‍കുട്ടികള്‍ ഉള്‍പ്പെടെ ലഹരി വസ്തുക്കള്‍ക്ക് അടിമകളാകുന്ന സംഭവങ്ങളും ഉണ്ടായതായി പറയപ്പെടുന്നു. ഇത്തരം ലഹരിക്കടിമയായ ഒരു വിദ്യാര്‍ഥിനി പിന്നീട് വിവാഹ ശേഷവും ലഹരിവസ്തു ഉപയോഗിച്ചതിനെ തുടര്‍ന്ന് ഇവരുടെ വിവാഹ ബന്ധം തകര്‍ന്ന സംഭവവും ജില്ലയില്‍ ഉണ്ടായിട്ടുണ്ട്.
സ്‌കൂളുകളും കോളജുകളും കേന്ദ്രീകരിച്ചു ജില്ലയില്‍ വന്‍ ലഹരി മാഫിയകളാണ് പ്രവര്‍ത്തിക്കുന്നത്. കഴിഞ്ഞ ദിവസം സ്‌കൂള്‍ വിദ്യാര്‍ഥികളെ ലക്ഷ്യം വച്ച് കടത്തുകയായിരുന്ന കഞ്ചാവ് പൊലിസ് പിടിച്ചെടുക്കുകയും പ്രതിയെ അറസ്റ്റു ചെയ്യുകയും ചെയ്തിരുന്നു.