റിയാദ്: സഊദിയിൽ കൊവിഡ്-19 വൈറസ് ബാധിതരുടെ എണ്ണം 1453 ഉയർന്നു. ഇന്ന് പുതുതായി 154 കേസുകൾ കൂടി സ്ഥിരീകരിച്ചതോടെയാണിത്. സഊദി ആരോഗ്യ മന്ത്രാലയമാണ് ഇക്കാര്യം അറിയിച്ചത്. ഇന്ന് അസുഖം സ്ഥിരീകരിച്ചവരില്‍‌ 138 പേര്‍ക്ക് രോഗം ബാധിച്ചത് സാമൂഹ്യ സമ്പര്‍ക്കത്തിലുടെയാണ്. ബാക്കിയുള്ളവര്‍ നേരത്തെ വിദേശത്ത് നിന്ന് ഐസൊലേഷനില്‍ കഴിയുന്നവരാണ്. ഇന്ന് മാത്രം 49 പേര്‍ രോഗമുക്തി നേടിയതോടെ അസുഖ മോചിതരുടെ എണ്ണം 115 ആയി. വൈറസ് ബാധിതരിൽ ഭൂരിഭാഗം പേരും നല്ല ആരോഗ്യവസ്ഥയിലാണെന്നും തിരിച്ചു വരാനാകുമെന്നും ശുഭ പ്രതീക്ഷയിലാണെന്നും മന്ത്രാലയം പറഞ്ഞു.
     വിദേശത്ത് നിന്ന് രാജ്യത്തെ വിവിധ വിമാനത്താവളങ്ങളില്‍ തിരിച്ചെത്തി നേരെ ഹോട്ടലില്‍ പാര്‍പ്പിച്ചിരുന്ന ആയിരത്തോളം പേര്‍ വീടുകളിലേക്ക് മടങ്ങിയിട്ടുണ്ട്. 14 ദിവസത്തെ സമയപരിധിക്കകത്ത് ഇവര്‍‌ സുരക്ഷിതരാണെന്ന് ഉറപ്പു വരുത്തിയാണ് മടക്കി അയക്കുന്നത്. നാളെ മുതല്‍ കൂടുതല്‍ പേരെ ഐസൊലേഷനില്‍ നിന്നും നിരീക്ഷണത്തില്‍ നിന്നും മാറ്റും.
      അതിനിടെ, സഊദിയിൽ സ്വദേശികൾക്കൊപ്പം പ്രവാസികൾക്കും സൗജന്യ ചികിത്സ നൽകാൻ ഉത്തരവിട്ടു. സഊദി ഭരണാധികാരി സൽമാൻ ബിൻ അബ്ദുൽ അസീസ് രാജാവാണ് ഉത്തരവ് പുറപ്പെടുവിച്ചത്. രാജ്യത്ത് നിയമലംഘകരായി കഴിയുന്ന വിദേശികൾക്കുൾപ്പെടെ കൊവിഡ്-19 ചികിത്സ ലഭ്യമാക്കണമെന്നാണ് ഉത്തരവ്. നിയമലംഘകരായ പ്രവാസികൾ ചികിത്സക്കെത്തുമ്പോൾ നിയമപരായ പ്രതിസന്ധികൾ പരിഗണിക്കാതെ തന്നെ ചികിത്സ നൽകാനാണ് നിർദേശം. രാജ്യത്ത് ഇഖാമയുടെ കാലാവധി കഴിഞ്ഞും ഹുറൂബിലായും കഴിയുന്ന നിരവധി വിദേശികൾക്ക് ഏറെ ആശ്വാസം നൽകുന്നതാണ് രാജാവിന്റെ ഉത്തരവ്.