തലശ്ശേരി: തലശ്ശേരി നഗരസഭയുടെ 150-ാം വാര്‍ഷികത്തിന്റെ ഭാഗമായി സര്‍ക്കസിന്റെ ഈറ്റില്ലമായ തലശ്ശേരിയില്‍ വീണ്ടും സര്‍ക്കസ് പ്രദര്‍ശനം ഒരുങ്ങുന്നു. ഗ്രാന്റ് സര്‍ക്കസാണ് ഏപ്രില്‍ ഒന്ന് മുതല്‍ നഗരസഭാ ടൗണ്‍ഹാളിന് സമീപത്തെ ഗ്രൗണ്ടില്‍ ആരംഭിക്കുന്നത്. ഒന്നിന് വൈകുന്നേരം ഏഴ് മണിക്ക് നഗരസഭാ ചെയര്‍മാന്‍ സി.കെ രമേശന്‍ സര്‍ക്കസ് പ്രദര്‍ശനം ഉദ്ഘാടനം ചെയ്യുമെന്ന് ഗ്രാന്റ് സര്‍ക്കസ് ഉടമ ചന്ദ്രനും പാട്ണര്‍ ഷെറിത്തും വാര്‍ത്താ സമ്മേളനത്തില്‍ അറിയിച്ചു. ഉദ്ഘാടനച്ചടങ്ങില്‍ ജെമിനി ശങ്കരന്‍ അധ്യക്ഷനാകും. വിവിധ രാഷട്രീയ പാര്‍ട്ടി പ്രതിനിധികള്‍ ആശംസകള്‍ നേരും. ഇന്ത്യക്കകത്തും പുറത്തുമുള്ള 150 ലേറെ കലാകാരന്‍മാര്‍ സര്‍ക്കസില്‍ അണിനിരക്കും. വാര്‍ത്താ സമ്മേളത്തില്‍ പ്രദീപ് പ്രതിഭയും പങ്കെടുത്തു.