ജിദ്ദ: അനുവദിക്കപ്പെട്ടതിലും കൂടുതല്‍ പണം വസ്ത്രങ്ങള്‍ക്കുള്ളിലും ലഗേജുകള്‍ക്കുള്ളിലും തിരുകി കടത്തുന്നവര്‍ സൂക്ഷിക്കുക. നിയമവിരുദ്ധമായ ഈ പ്രവര്‍ത്തനം നടത്തിയാല്‍ നിങ്ങള്‍ അകത്താകും. 

ലഗേജുകളിലും വസ്ത്രങ്ങള്‍ക്കുള്ളിലും ഒളിപ്പിച്ചു പണം കടത്തുന്നത് കണ്ടെത്തുന്നതിന് സഊദി അറേബ്യയിലെ അന്താരാഷ്ട്ര വിമാനത്താവളങ്ങളില്‍ സ്മാര്‍ട്ട് കാമറകള്‍ സ്ഥാപിക്കുന്ന കാര്യം സഊദി കസ്റ്റംസിന്റെ സജീവ പരിഗണനയിലാണ്. ബാഗേജുകള്‍ പരിശോധിക്കുന്നതിന് സ്മാര്‍ട്ട് ടേബിളുകളും സ്ഥാപിക്കും. സഊദിയില്‍ നിന്ന് പുറത്തുപോകുന്നവും വരുന്നവരും പണവും സ്വര്‍ണവും ട്രാവലേഴ്‌സ് ചെക്കുകളും അടക്കം 60,000 റിയാല്‍ കൊണ്ടുവരാനേ അനുമതിയുള്ളൂ. 

അതില്‍ കൂടുതലുമുള്ള പണത്തെ കുറിച്ച് മുന്‍കൂട്ടി കസ്റ്റംസില്‍ വെളിപ്പെടുത്തണം. അങ്ങനെ ചെയ്യാതെ അനുവദിക്കപ്പെട്ടതിലും കൂടുതല്‍ പണം ചിലരെങ്കിലും കൊണ്ടുപോകാറുണ്ടെന്നു മനസിലാക്കിയ സാഹചര്യത്തിലാണ് പുതിയ സംവിധാനം ഒരുക്കുന്നത്.

കസ്റ്റംസ് ചട്ടം ലംഘിക്കുന്നവര്‍ക്ക് പിടികൂടുന്ന പണത്തിന്റ 25 ശതമാനത്തിന് തുല്യമായ തുക പിഴ ചുമത്തും. നിയമ ലംഘനം ആവര്‍ത്തിച്ച് കുടുങ്ങുന്നവര്‍ക്ക് പിടികൂടുന്ന പണത്തിന്റ 50 ശതമാനത്തിന് തുല്യമായ തുകയാവും പിഴ. കസ്റ്റംസിനു മുന്നില്‍ മുന്‍കൂട്ടി വെളിപ്പെടുത്താതെ കടത്താന്‍ ശ്രമിക്കുന്ന പണത്തിന് കുറ്റകൃത്യവുമായോ പണം വെളുപ്പിക്കലുമായോ ബന്ധമുണ്ടെന്ന് കണ്ടെത്തിയാല്‍ പണം മുഴുവന്‍ പിടിച്ചെടുത്ത് നിയമ ലംഘകരെ കോടതിയില്‍ വിചാരണ ചെയ്യും. 

ഇത്തരം കേസുകളില്‍ കുറ്റക്കാരാണെന്ന് കണ്ടെത്തുന്നവരുടെ പണം കണ്ടുകെട്ടുമെന്നു മാത്രമല്ല, പത്തു വര്‍ഷം വരെ തടവും 50 ലക്ഷം റിയാല്‍ വരെ പിഴയും ശിക്ഷയായി ലഭിക്കും.