കൊണ്ടോട്ടി:കനത്ത മഴയില്‍ കരിപ്പൂര്‍ വിമാനത്താവളത്തിന്റെ മതില്‍ തകര്‍ന്നു. കേന്ദ്ര സുരക്ഷാ സേനയെ വിന്യസിച്ച് സുരക്ഷ ശക്തമാക്കി.
ഇന്നലെ ഉച്ചക്കും വൈകീട്ടുമുണ്ടായ കനത്ത മഴയിലാണ് റണ്‍വെയുടെ തെക്ക് ഭാഗം കൂട്ടാലുങ്ങല്‍ പൂക്കുത്ത് തൊട്ടിയില്‍ ഭാഗത്ത് വിമാനത്താവളത്തിന്റെ ചുറ്റുമതില്‍ അടക്കം തകര്‍ന്നത്.
വിമാനത്താവളത്തില്‍ നാവിഗേഷന്‍ സംവിധാനം നവീകരിക്കുന്നതിന്റെ ഭാഗമായി സ്ഥാപിക്കുന്ന വി.ഒ.ആര്‍ സംവിധാനത്തിനായി പുതുതായി നിര്‍മിച്ച മതിലാണ് മഴയില്‍ നിലംപൊത്തിയത്. റണ്‍വേയുടെ പെരിമീറ്റര്‍ റോഡിനോട് ചേര്‍ന്ന് കരിങ്കല്ല് കൊണ്ട് കെട്ടിയ മതിലാണിത്. തകര്‍ന്ന മതിലും വെളളവും കുത്തിയൊലിച്ചതോടെ വിമാനത്താവളത്തിന്റെ ചുറ്റുമതിലിന്റെ ഒരു ഭാഗവും തകര്‍ന്നു. മതില്‍ 20 മീറ്ററിലേറെ തകര്‍ന്നിട്ടുണ്ട്.
സമീപ ഭാഗങ്ങളും തകര്‍ച്ചാ ഭീഷണിയിലാണ്. റണ്‍വെയുടെ അരികില്‍ പുതുതായി മണ്ണ് കൊണ്ടുവന്നിട്ട സ്ഥലം മഴപെയ്തതോടെ കുതിര്‍ന്ന് മതില്‍ തകരുകയായിരുന്നു. വിമാനത്താവള ചുറ്റുമതിലിന് സമീപത്തെ കിണറുകളിലും ചെളിവെളളം നിറഞ്ഞ് മലിനമായിട്ടുണ്ട്. തകര്‍ന്ന ഭാഗത്ത് പ്രത്യേക സുരക്ഷ ശക്തമാക്കി.
ഈ പ്രദേശത്ത് കൂടുതല്‍ സി.ഐ.എസ്.എഫുകാരെ നിയോഗിച്ചിട്ടുണ്ട്. സുരക്ഷാ മേഖലയായതിനാല്‍ നിര്‍മാണം പെട്ടെന്ന് നടത്താനാണ് നീക്കം. തകര്‍ന്ന സ്ഥലം വിമാനത്താവള ഡയരക്ടര്‍ കെ. ശ്രീനിവാസ റാവു സന്ദര്‍ശിച്ചു.