ന്യൂഡല്‍ഹി: കോവിഡ്-19 പടര്‍ന്നതിനെത്തുടര്‍ന്ന് കേരള- കര്‍ണാടക അതിര്‍ത്തിയിലെ ദേശീയപാത 66 ഉള്‍പ്പെടെയുള്ള റോഡുകളും മറ്റ് ഉള്‍നാടന്‍ റോഡുകളും അടച്ച കര്‍ണാടക സര്‍ക്കാര്‍ നടപടിക്കെതിരേ കാസര്‍കോട് എം.പി രാജ്‌മോഹന്‍ ഉണ്ണിത്താന്‍ സമര്‍പ്പിച്ച ഹരജി സുപ്രിംകോടതി ഇന്നു പരിഗണിക്കും. 

 

ജസ്റ്റിസുമാരായ എല്‍ നാഗേശ്വര്‍ റാവു, ദീപക് ഗുപ്ത എന്നിവരടങ്ങിയ ബെഞ്ചാണ് ഹരജി പരിഗണിക്കുക.കര്‍ണാടക സര്‍ക്കാര്‍ റോഡുകള്‍ അടച്ചതോടെ കേരളത്തിലേക്ക് അവശ്യവസ്തുക്കള്‍ എത്തിക്കുന്നതിന് തടസം നേരിട്ടതായും കാസര്‍കോട് ജില്ലയിലെ ജനങ്ങള്‍ക്ക് മംഗലാപുരം അടക്കമുള്ള കര്‍ണാടകത്തിലെ ആതുര ശുശ്രൂഷാ സൗകര്യങ്ങള്‍ ഉപയോഗപ്പെടുത്താന്‍ കഴിയാതെ വന്നതായും ഹരജി ചൂണ്ടിക്കാട്ടുന്നു. കര്‍ണാടക സര്‍ക്കാര്‍ നടപടി ഭരണഘടനയുടെ ഫെഡറല്‍ സംവിധാനത്തിന് എതിരാണെന്നും ഭരണഘടന ഉറപ്പുനല്‍കുന്ന സഞ്ചാരസ്വാതന്ത്ര്യം, ആഹാരം ലഭ്യമാകാനുള്ള അവകാശം, ആരോഗ്യ ശുശ്രൂഷയ്ക്കുള്ള അവകാശം തുടങ്ങിയവയുടെ ലംഘനമാണെന്നും ഹരജി വാദിക്കുന്നു. 

 

റോഡ് തടസം മൂലം ചികിത്സകിട്ടാതെ രണ്ടു രോഗികള്‍ മരിക്കാനിടയായതിലെ ഉത്തരവാദികളെ കണ്ടെത്തുന്നതിന് പ്രത്യേക അന്വേഷണ സംഘത്തെ നിയോഗിക്കണമെന്നും ഹരജിയില്‍ ആവശ്യമുണ്ട്.