ലണ്ടന്‍: കലണ്ടര്‍ സ്ലാം ലക്ഷ്യമിട്ടു വിംബിള്‍ഡണിനെത്തിയ നിലവിലെ ചാംപ്യനും ലോക ഒന്നാം നമ്പര്‍ താരവുമായ സെര്‍ബിയയുടെ നൊവാക് ദ്യോക്കോവിച് പുറത്ത്. കരിയര്‍ സ്ലാം തികച്ച് മികച്ച ഫോമിലെത്തിയ ദ്യോക്കോയെ അമേരിക്കയുടെ സാം ക്യൂറെയാണ് വമ്പന്‍ അട്ടിമറിയിലൂടെ മുട്ടുകുത്തിച്ചത്. സ്‌കോര്‍ 6-7, 6-1, 6-3, 6-7. മികവോടെ തുടങ്ങിയ ദ്യോക്കോവിചിനെ ഇഞ്ചോടിഞ്ച് പോരാട്ടത്തില്‍ അട്ടിമറിക്കുകയായിരുന്നു ക്യൂറെ. ആദ്യ രണ്ടു സെറ്റുകളും മികവോടെ സ്വന്തമാക്കിയ അമേരിക്കന്‍ താരം മൂന്നാം സെറ്റില്‍ അടിയറവ് പറഞ്ഞെങ്കിലും നിര്‍ണായകമായ നാലാം സെറ്റില്‍ മികച്ച പോരാട്ടം പുറത്തെടുത്താണ് ക്യൂറെ മത്സരം സ്വന്തമാക്കിയത്.

ആദ്യത്തെ രണ്ടു സെറ്റുകളില്‍ നിരവധി പിഴവുകളാണ് ദ്യോക്കോവിച് വരുത്തിയത്. നേരത്തെ അവസാന സെറ്റില്‍ മഴ കളി മുടക്കിയിരുന്നു. ഇതു ദ്യോക്കോയ്ക്ക് ആത്മവിശ്വാസം നല്‍കുമെന്ന് കരുതിയെങ്കിലും കളി പുനരാരംഭിച്ച ഉടനെ ക്യൂറെ മത്സരം വരുതിയിലാക്കി.

മറ്റ് മത്സരങ്ങളില്‍ ബ്രിട്ടീഷ് താരം ഡാനിയല്‍ ഇവാന്‍സിനെ വീഴ്ത്തി റോജര്‍ ഫെഡറര്‍ നാലാം റൗണ്ടില്‍ കടന്നു. സ്‌കോര്‍ 6-4, 6-2, 6-2. നിഷികോരി, സിലിച്, മഹുറ്റ് എന്നിവരും നാലാം റൗണ്ടില്‍ കടന്നിട്ടുണ്ട്. വനിതാ വിഭാഗത്തില്‍ വീനസ് വില്യംസ് റഷ്യയുടെ ദാരിയ കസാത്കിനയെ പരാജപ്പെടുത്തി നാലാം റൗണ്ടില്‍ കടന്നു. സ്‌കോര്‍ 7-5, 4-, 10-8. സഹോദരി സെറീന നാട്ടുകാരി ക്രിസ്റ്റിന മക്‌ഹേലിനെ വീഴ്ത്തി മൂന്നാം റൗണ്ടില്‍ കടന്നു. സ്‌കോര്‍ 6-7, 6-2, 6-4. മറ്റൊരു പോരാട്ടത്തില്‍ വിറ്റോഫ്റ്റിനെ വീഴ്ത്തി ആഞ്ജലിക കെര്‍ബറും നാലാം റൗണ്ടില്‍ കടന്നു.