തിരുവനന്തപുരം: കാമുകനൊപ്പം ജീവിക്കാന്‍ വീട്ടില്‍നിന്നിറങ്ങിയ പെണ്‍കുട്ടിയെ ബന്ധുക്കള്‍ മറ്റൊരു കാറില്‍ പിന്തുടര്‍ന്നു പിടികൂടി. യുവതിയെ തിരിച്ചു കൊണ്ടുപോകാന്‍ ബന്ധുക്കള്‍ നടത്തിയ ശ്രമം കൈയാങ്കളിയില്‍ കലാശിച്ചതിനെ തുടര്‍ന്ന് എല്ലാവരേയും പൊലിസ് പിടികൂടി.
സംഭവത്തെക്കുറിച്ച് പൊലിസ് പറയുന്നത്: കൊല്ലം ചടയമംഗലം സ്വദേശിയായ യുവതി കുളത്തൂപ്പുഴ ചോഴിയക്കോട് സ്വദേശിയായ വിഷ്ണുവിനോടൊപ്പമാണ് (25) കഴിഞ്ഞ ദിവസം അര്‍ധരാത്രി വീട്ടില്‍നിന്നിറങ്ങിപ്പോയത്. സ്വകാര്യ ബസ് ജീവനക്കാരനായ വിഷ്ണുവുമായി യുവതി ഏറെ നാളായി പ്രണയത്തിലായിരുന്നു.
കഴിഞ്ഞ ദിവസം രാത്രി 12 മണിയോടെ കാറില്‍ വിഷ്ണു വീട്ടിലെത്തി യുവതിയെ വിളിച്ചിറക്കുകയായിരുന്നു. മൊബൈല്‍ ഫോണിന്റെ ചാര്‍ജര്‍ പുറത്തുവച്ച് മറന്നത് എടുക്കാന്‍ എന്ന വ്യാജേന വീടിന് പുറത്തിറങ്ങിയ യുവതി അവിടെ കാത്തുനിന്ന കാറില്‍ കയറി വിഷ്ണുവിനൊപ്പം പോയി. തുടര്‍ന്ന് മാതാവിനെ ഫോണില്‍ വിളിച്ച് വിവരം അറിയിച്ചു.
വിവരമറിഞ്ഞ് യുവതിയുടെ ബന്ധുക്കള്‍ മൂന്ന് കാറുകളിലായി വിഷ്ണുവിന്റെ കാറിനെ പിന്തുടര്‍ന്നു. പുലര്‍ച്ചെ രണ്ടരമണിയോടെ തിരുവനന്തപുരം നഗരത്തില്‍ മെഡിക്കല്‍ കോളജിന് സമീപം യുവതിയുടെ ബന്ധുക്കള്‍ വിഷ്ണുവിന്റെ കാര്‍ റോഡില്‍ തടഞ്ഞു.
കാറില്‍ നിന്ന് യുവതിയെ ബലമായി പിടിച്ചിറക്കിക്കൊണ്ടുപോകാനുള്ള ബന്ധുക്കളുടെ ശ്രമം കൈയാങ്കളിയായി. റോഡില്‍ വാക്കേറ്റവും പിടിവലിയും ശ്രദ്ധയില്‍പ്പെട്ട വഴിയാത്രക്കാര്‍ വിവരം പൊലിസിന് കൈമാറി. പൊലിസെത്തുന്നത് ശ്രദ്ധയില്‍പ്പെട്ടതോടെ എല്ലാവരും കാറുകളില്‍ കയറി രക്ഷപ്പെട്ടു. ഇവരെ പിന്തുടര്‍ന്ന പൊലിസ്, വാഹനങ്ങള്‍ തടഞ്ഞ് എല്ലാവരെയും കസ്റ്റഡിയിലെടുത്ത് മെഡിക്കല്‍ കോളജ് പൊലിസ് സ്റ്റേഷനിലേക്ക് കൊണ്ടുപോയി. കാമുകനൊപ്പം പുറപ്പെട്ട യുവതിയെ വഴിയില്‍ തടയുകയും ആക്രമിക്കാന്‍ ശ്രമിക്കുകയും ചെയ്തതിന് യുവതിയുടെ ബന്ധുക്കളായ എഴുപേര്‍ക്കെതിരേ പൊലിസ് കേസെടുത്ത് ജാമ്യത്തില്‍ വിട്ടു.
യുവതിയെ കാണാനില്ലെന്ന് ബന്ധുക്കള്‍ ചടയമംഗലം പൊലിസ് സ്റ്റേഷനില്‍ നല്‍കിയിരുന്ന പരാതിയുടെ അടിസ്ഥാനത്തില്‍ യുവതിയേയും യുവാവിനേയും രാവിലെ ചടയമംഗലം പൊലിസിന് കൈമാറുകയും ചെയ്തു.