പുനലൂര്‍(കൊല്ലം): കെവിനെ കൊലപാതകസംഘം തട്ടിക്കൊണ്ടുപോകുമ്പോള്‍ ധരിച്ചിരുന്ന കൈലിമുണ്ട് പുനലൂരില്‍ നെല്ലിപ്പള്ളി പെട്രോള്‍ പമ്പിനു സമീപം കല്ലടയാറിന്റെ തീരത്തു നിന്ന് കേസ് അന്വേഷിക്കുന്ന പൊലിസ് സംഘം കണ്ടെടുത്തു. എന്നാല്‍ മൃതദേഹം കിടന്ന സ്ഥലത്ത് നിന്ന് ഏഴ് കിലോമീറ്ററോളം അകലെയുള്ള സ്ഥലത്ത് നിന്ന് കൈലിമുണ്ട് കണ്ടെടുത്തത് സംഭവത്തില്‍ ദൂരൂഹതയുയര്‍ത്തുന്നുണ്ട്. കെവിനെ തട്ടിക്കൊണ്ടുവന്ന സംഘത്തിലെ അംഗമായ പുനലൂര്‍ ഭരണിക്കാവിനടുത്ത് വാടകയ്ക്കു താമസിക്കുന്ന ഷെഫിനെ കഴിഞ്ഞദിവസം പുലര്‍ച്ചെ നാലരയോടെ ഇവിടെ തെളിവെടുപ്പിനായി കൊണ്ടുവന്നപ്പോഴാണ് മുണ്ട് കണ്ടെടുത്തത്.
ഷെഫിനെ തെളിവെടുപ്പിനായി കെവിന്റെ മൃതദേഹം കിടന്ന ചാലിയക്കര ആറിനടുത്തുള്ള തോട്ട തൊങ്കലിലും കൊണ്ടുവന്നു. കെവിനെ നെല്ലിപ്പള്ളി വഴി കൊണ്ടുവന്ന് കല്ലടയാറ്റില്‍ മുക്കികൊന്നശേഷം ചാലിയക്കര ആറ്റില്‍ കൊണ്ടിട്ടതാണോയെന്നും പൊലിസ് പരിശോധിക്കുന്നുണ്ട്. കോട്ടയം ക്രൈം ബ്രാഞ്ച് ഡിവൈ.എസ്.പി ഗിരീഷ് പി. സാരഥിയുടെ നേതൃത്വത്തിലുള്ള പൊലിസ് സംഘമാണ് തെളിവെടുപ്പിനു നേതൃത്വം നല്‍കിയത്. വന്‍ പൊലിസ് സംഘം സുരക്ഷ ഒരുക്കി അതീവ രഹസ്യമായിട്ടാണ് പ്രതിയെ തെളിവെടുപ്പിനു കൊണ്ടുവന്നത്.