തിരുവനന്തപുരം: യന്ത്രതകരാറിനെ തുടർന്ന് തിരുവനന്തപുരം വിമാനത്താവളത്തിൽ അടിയന്തരമായി ഇറക്കിയ ബ്രിട്ടീഷ് യുദ്ധവിമാനത്തെ ടൂറിസം പ്രചാരണത്തിന് ആകർഷകമായ വിഷയമാക്കി കേരള ടൂറിസം വകുപ്പ്. 'ഒരിക്കൽ വന്നാൽ തിരിച്ചുപോകാൻ തോന്നില്ല' എന്ന ക്യാപ്ഷനോടുകൂടി ബ്രിട്ടീഷ് എഫ്-35 യുദ്ധവിമാനത്തിന്റെ ചിത്രം ഉൾപ്പെടുത്തിയാണ് കേരള ടൂറിസത്തിന്റെ പുതിയ പരസ്യം സാമൂഹ്യമാധ്യമങ്ങളിൽ വൈറലായത്.

"കേരളം അതിമനോഹരമായ പ്രദേശമാണ്. എനിക്ക് തിരിച്ചുപോകേണ്ട. തീർച്ചയായും ശുപാർശ ചെയ്യുന്നു!" എന്ന വാചകത്തോടൊപ്പം അഞ്ച് സ്റ്റാർ റേറ്റിങ് നൽകുന്ന രീതിയിലാണ് കേരള ടൂറിസം പങ്കുവച്ച പോസ്റ്റർ. ഈ പരസ്യം സാമൂഹ്യമാധ്യമങ്ങളിൽ വൻ സ്വീകാര്യത നേടിയിട്ടുണ്ട്. നിരവധി പേർ രസകരമായ കമന്റുകളുമായി രംഗത്തെത്തി. "വിമാനത്തിന് ആയുർവേദ ചികിത്സ നൽകി ഉഴിച്ചിൽ നടത്തി തിരിച്ചയക്കണം," എന്നാണ് ഒരു കമന്റ്. "ഓണവും വള്ളംകളിയും കണ്ടിട്ട് പോകാം," എന്ന് നിർദേശിക്കുന്നവരും, "നോക്കുകൂലി വാങ്ങാതെ വിടരുത്," എന്ന് തമാശയായി പറയുന്നവരും ഏറെയാണ്.

ALSO READ: എം.വി.ഡി കണ്ടുകെട്ടിയ വാഹനങ്ങൾ സൂക്ഷിക്കാൻ കേന്ദ്രങ്ങൾ ആരംഭിക്കുന്നു; നീക്കം സ്വകാര്യ പങ്കാളിത്തത്തോടെ

അറബിക്കടലിൽ നടന്ന സൈനികാഭ്യാസത്തിന്റെ ഭാഗമായി എച്ച്എംഎസ് പ്രിൻസ് ഓഫ് വെയിൽസ് എന്ന ബ്രിട്ടീഷ് യുദ്ധക്കപ്പലിൽനിന്ന് പറന്നുയർന്ന എഫ്-35 വിമാനം, ഇന്ധനക്ഷാമവും യന്ത്രതകരാറും മൂലം ജൂൺ 14-ന് രാത്രി തിരുവനന്തപുരം വിമാനത്താവളത്തിൽ അടിയന്തര ലാൻഡിങ് നടത്തുകയായിരുന്നു. തകരാർ പരിഹരിക്കാൻ കഴിയാത്തതിനാൽ വിമാനം ഇപ്പോഴും തിരുവനന്തപുരത്ത് തുടരുകയാണ്. വിമാനം എത്തിച്ച യുദ്ധക്കപ്പൽ സിംഗപ്പൂർ തീരത്തേക്ക് മടങ്ങിയെങ്കിലും, എഫ്-35 വിമാനം കേരളത്തിൽ ചർച്ചയുടെ കേന്ദ്രമായി മാറി. ഓൺലൈൻ വ്യാപാര വെബ്‌സൈറ്റായ ഒഎൽഎക്‌സിൽ വിമാനം വിൽപ്പനയ്ക്ക് വച്ചതും വാർത്തയായിരുന്നു.

കേരളത്തിന്റെ പ്രകൃതിഭംഗിയും ആതിഥ്യമര്യാദയും ഉപയോഗിച്ച് ഈ അപ്രതീക്ഷിത സംഭവത്തെ ടൂറിസം പ്രചാരണത്തിന് വിനിയോഗിച്ച കേരള ടൂറിസം വകുപ്പിന്റെ സർഗാത്മകതയെ സാമൂഹ്യമാധ്യമ ഉപയോക്താക്കൾ വളരെ രസകരമായി സ്വീകരിച്ചിരിക്കുകയാണ്.

Kerala Tourism has creatively turned a British F-35 fighter jet, grounded at Thiruvananthapuram airport due to technical issues, into a viral ad campaign. With the caption "Once you come, you won't want to leave," the campaign features the jet alongside Kerala's scenic beauty, earning widespread praise and humorous social media reactions.