കാസര്‍കോട്: പഴയ ചൂരിയില്‍ മദ്‌റസാ അധ്യാപകനെ കൊലപ്പെടുത്തിയ കേസിലെ പ്രതികളുമായി പൊലിസ് തെളിവെടുപ്പ് നടത്തി. പ്രതികള്‍ കൊലപാതകം ആസൂത്രണം ചെയ്ത സ്ഥലം, കൊലപാതകത്തിനു ശേഷം ഒളിവില്‍ കഴിഞ്ഞ സ്ഥലങ്ങള്‍, ആയുധങ്ങള്‍ ഉപേക്ഷിച്ച സ്ഥലം എന്നിവിടങ്ങളിലാണ് പ്രധാനമായും പ്രതികളുമായെത്തി പൊലിസ് തെളിവെടുപ്പു നടത്തിയത്.
അന്വേഷണത്തിന്റെ ഭാഗമായി കൂടുതല്‍ ചോദ്യം ചെയ്യുന്നതിനും തെളിവെടുപ്പു നടത്തുന്നതിനുമായി കഴിഞ്ഞ ദിവസം പ്രതികളെ അഞ്ചു ദിവസത്തെ പൊലിസ് കസ്റ്റഡിയില്‍ വിട്ടിരുന്നു. അതേ സമയം റിയാസ് മുസ്‌ലിയാര്‍ കൊല്ലപ്പെട്ട താമസ സ്ഥലത്ത് ഇദ്ദേഹത്തിന്റെ മൃതദേഹം പോസ്റ്റുമോര്‍ട്ടം നടത്തിയ പരിയാരം മെഡിക്കല്‍ കോളജ് ആശുപത്രിയിലെ പൊലിസ് സര്‍ജന്‍ ഡോ. കെ ഗോപാലകൃഷ്ണപിള്ളയുടെ നേതൃത്വത്തില്‍ പരിശോധന നടത്തി. കഴിഞ്ഞ ദിവസം ഉച്ചയ്ക്ക് കാസര്‍കോട്ടെത്തിയ അദ്ദേഹം പ്രത്യേക അന്വേഷണ സംഘത്തലവന്‍ എ. ശ്രീനിവാസിനും സംഘാംഗങ്ങള്‍ക്കും ഒപ്പമാണ് ചൂരിയിലെത്തിയത്. റിയാസ് മുസ്‌ലിയാരെ കൊലപ്പെടുത്തിയ മുറി, പള്ളി, പള്ളി പരിസരം, ഇവിടേക്കുള്ള വഴികള്‍ എന്നിവയെല്ലാം സംഘം വിശദമായി പരിശോധിച്ചു.
കേസിനു ശാസ്ത്രീയ പിന്‍ബലം ഉണ്ടാക്കുന്നതിന്റെ ഭാഗമായാണ് മൃതദേഹം പോസ്റ്റുമോര്‍ട്ടം നടത്തിയ ഫോറന്‍സിക് സര്‍ജന്റെ സഹായം അന്വേഷണ സംഘം തേടിയത്. എന്നാല്‍ തെളിവെടുപ്പ് സംബന്ധിച്ച കൂടുതല്‍ വിവരങ്ങള്‍ അന്വേഷണ സംഘം പുറത്തു വിട്ടിട്ടില്ല.