കല്‍പ്പറ്റ: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസിലെ പ്രതി കോടതി വിധിയില്‍ പ്രകോപിതനായി ജഡ്ജിക്കു നേരെ ചെരിപ്പെറിഞ്ഞു. മൂപ്പൈനാട് കടച്ചിക്കുന്ന് സ്വദേശി കുന്നുമ്മല്‍ അറുമുഖനാണ്(55) പോക്‌സോ കോടതിയായ അഡീഷണല്‍ ഡിസ്ട്രിക്ട് സെഷന്‍സ് കോടതി ഒന്ന് ജഡ്ജ് പഞ്ചാബകേശനു നേരെ ചെരിപ്പെറിഞ്ഞത്.
അയല്‍വാസിയായ പ്രായപൂര്‍ത്തിയാവാത്ത പെണ്‍കുട്ടിയെ മാനഭംഗപ്പെടുത്തിയ കേസില്‍ വിധി പറഞ്ഞയുടനെയായിരുന്നു സംഭവം. വിധി കേട്ട് പ്രകോപിതനായ പ്രതി സ്വന്തം ഷൂ ഊരി ജഡ്ജിക്കു നേരെ എറിയുകയായിരുന്നു. ഇന്നലെ രാവിലെ 11.30ഓടെയാണ് സംഭവം.
മേപ്പാടി പൊലിസ് രജിസ്റ്റര്‍ ചെയ്ത കേസില്‍ പോക്‌സോ, മാനഭംഗം ഉള്‍പ്പെടെ വിവിധ വകുപ്പുകളിലായി 10 വര്‍ഷം വീതവും, അഞ്ചു വര്‍ഷവുമടക്കം 25 വര്‍ഷത്തേക്കാണ് പ്രതിയെ ശിക്ഷിച്ചത്.
സംഭവം നടന്ന ഉടനെ കോടതി രജിസ്ട്രാറുടെ റിപ്പോര്‍ട്ട് പ്രകാരം കല്‍പ്പറ്റ സി.ഐ ടി.പി ജേക്കബ്, എസ്.ഐ എ.യു ജയപ്രകാശ് എന്നിവര്‍ സ്ഥലത്തെത്തി പരിശോധന നടത്തി. ജഡ്ജ് പഞ്ചാബകേശന്‍ ആശുപത്രിയില്‍ ചികിത്സ തേടി.
പ്രതിയുടെ പേരില്‍ രണ്ട് അടിപിടി കേസ് നിലവിലുണ്ട്. പോക്‌സോ കേസില്‍ പ്രതിയുടെ മക്കളും, അയല്‍വാസികളും ജാമ്യമെടുത്തിരുന്നു.
പ്രതിയുടെ ക്രിമിനല്‍ സ്വഭാവം നിമിത്തം ജാമ്യം ഒഴിവായതിനെ തുടര്‍ന്ന് ആറു മാസമായി വിചാരണ തടവുകാരനായി കഴിയുകയായിരുന്നു ഇയാള്‍. കോടതിയില്‍ ജഡ്ജിക്കു നേരെ ഷൂ എറിഞ്ഞ സംഭവത്തില്‍ പ്രതിയുടെ പേരില്‍ ഔദ്യോഗിക കൃത്യനിര്‍വഹണം തടസപ്പെടുത്തല്‍.
മനപ്പൂര്‍വം ദേഹോപദ്രവം ഏല്‍പ്പിക്കല്‍ എന്നീ വകുപ്പുകള്‍ പ്രകാരം കേസെടുത്തതായി കല്‍പ്പറ്റ എസ്.ഐ എ.യു ജയപ്രകാശ് പറഞ്ഞു. പ്രതിയെ വൈത്തിരി സബ്ജയിലിലേക്ക് കൊണ്ടുപോയി.