മാനന്തവാടി: അപ്രതീക്ഷിതമായി എത്തിയ മഴയില്‍ നെല്‍കൃഷി വിളവെടുക്കാന്‍ കഴിയാതെ കര്‍ഷകര്‍. തിരുനെല്ലിയിലെ അറവനാഴി, പോത്തുമൂല, കാട്ടിക്കുളം, പുളിമൂട് കുന്ന്, ബാവലി, ഷാണമംഗലം പാല്‍വെളിച്ചം എന്നിവിടങ്ങളിലെ കര്‍ഷകരാണ് പുഞ്ചകൃഷി കൊയ്‌തെടുക്കാന്‍ കഴിയാതെ പ്രതിസന്ധിയിലായത്.
കൂടാതെ വിവിധ കുടുംബശ്രീ ജെ.എല്‍.ജി ഗ്രൂപ്പുകള്‍ വേറെയും പുഞ്ചകൃഷി ചെയ്തിരുന്നു. ഉച്ച കഴിഞ്ഞും രാത്രിയും പെയ്യുന്ന കനത്ത മഴയില്‍ വിളഞ്ഞ നെല്‍കൃഷി കരക്കെത്തിക്കാന്‍ പാടുപെടുകയാണ് ഇവര്‍. ചിലയിടങ്ങളില്‍ പാതി കൊയ്ത് നിര്‍ത്തിയെങ്കിലും വാരാന്‍ സാധിക്കാതെ വെള്ളത്തില്‍ മുങ്ങിയ അവസ്ഥയാണ്. പുറമേ രാത്രിയില്‍ കൃഷിയിടത്തിലെത്തുന്ന കാട്ടുപന്നി കൂട്ടങ്ങളും ആനയും കൃഷി നശിപ്പിക്കുന്നതും കര്‍ഷകര്‍ക്ക് തിരിച്ചടിയാകുകയാണ്. മുന്‍ വര്‍ഷം വന്യ ജീവികള്‍ നശിപ്പിച്ച കൃഷിക്കുള്ള ഒരു തുക പോലും വനം വകുപ്പില്‍ നിന്ന് ലഭിച്ചിട്ടില്ലെന്നും കര്‍ഷകര്‍ പറയുന്നു. തരിശ് കൃഷിക്കായി ലക്ഷങ്ങള്‍ മുടക്കിയതായി കൃഷി വകുപ്പ് അവകാശപ്പെടുമ്പോഴും ഒരു രൂപ പോലും കിട്ടിയില്ലന്ന് കര്‍ഷകര്‍ പറഞ്ഞു.