തൃശൂര്‍: എസ്.കെ.എസ്.എസ്.എഫ് തൃശൂര്‍ ജില്ലാ മദീന പാഷന്റെ ഏറ്റവും പ്രധാനപ്പെട്ട പരിപാടികളിലൊന്നായ ഗ്രാന്റ് അസംബ്ലി പുതുമയും ആവേശവുമായി. രാവിലെ ഒന്‍പതിന് റിജ്യനല്‍ തിയറ്ററില്‍ പാണക്കാട് അബ്ബാസലി ശിഹാബ് തങ്ങള്‍, ഓണമ്പിള്ളി മുഹമ്മദ് ഫൈസി, ബഷീര്‍ ഫൈസി ദേശമംഗലം തുടങ്ങിയ സംസ്ഥാന നേതാക്കള്‍ ഗ്രാന്റ് അസംബ്ലിയില്‍ അണിചേര്‍ന്നത് പ്രവര്‍ത്തകരില്‍ നവ്യാനുഭൂതി പകര്‍ന്നു.
സമുദായത്തിന്റെ വിശ്വാസ പ്രമാണങ്ങള്‍ അനുസരിച്ച് ജീവിക്കാനും രാജ്യത്തിന്റെ നന്മക്കും ലോക സമാധാനത്തിനു വേണ്ടിയും പ്രവാചക ജീവിതചര്യ നിലനിര്‍ത്തുമെന്ന ഉറച്ച പ്രഖ്യാപനവുമായി എസ്.കെ.എസ്.എസ്.എഫ് ജില്ലാ പ്രസിഡന്റ് സിദ്ദീഖ് ബദരി ചൊല്ലിക്കൊടുത്ത പ്രതിജ്ഞ നൂറുകണക്കിന് പ്രവര്‍ത്തകര്‍ ഏറ്റുചൊല്ലി.