തിരുവനന്തപുരം: കൊവിഡ്-19 പ്രതിരോധ നടപടികളുടെ ഭാഗമായി സമൂഹവ്യാപനം തടയുന്നതിനാവശ്യമായ നിര്‍ദേശങ്ങള്‍ സര്‍ക്കാരിന് സമര്‍പ്പിച്ച് കെ.ജി.എം.ഒ.എ (കേരള ഗവണ്‍മെന്റ് മെഡിക്കല്‍ ഓഫിസേഴ്‌സ് അസോസിയേഷന്‍). കൊവിഡ് സംശയിക്കുന്നവരുടെ വിവര ശേഖരണവും വിശകലനവും ഗൃഹനിരീക്ഷണവും പ്രതിരോധ പ്രവര്‍ത്തനങ്ങളും നടത്തുന്ന പ്രാഥമിക ആരോഗ്യ കേന്ദ്രങ്ങളിലെയും കുടുംബാരോഗ്യ കേന്ദ്രങ്ങളിലെയും ഓഫിസര്‍മാര്‍ക്കാണ് ഇക്കാര്യത്തില്‍ കാര്യമായി ഇടപെടാനാകുക എന്ന് കെ.ജി.എം.ഒ.എ ചൂണ്ടിക്കാട്ടുന്നു.
പതിവ് രോഗീപരിചരണത്തില്‍ നിന്നും ഒ.പിയില്‍ നിന്നും പ്രാഥമികാരോഗ്യ കേന്ദ്രങ്ങളിലെയും കുടുംബാരോഗ്യ കേന്ദ്രങ്ങളിലെയും മെഡിക്കല്‍ ഓഫിസര്‍മാരെ പതിവ് ഒ.പിയില്‍ നിന്നും പൂര്‍ണമായും ഒഴിവാക്കുകയും പ്രാഥമിക തലത്തിലുള്ള സ്ഥാപനങ്ങള്‍ എല്ലാം കൂടുതല്‍ ഡോക്ടര്‍മാരെ നിയമിച്ച് ശക്തീകരിക്കുകയും വേണമെന്ന് കെ.ജി.എം.ഒ.എ ചൂണ്ടിക്കാട്ടുന്നു.
സംസ്ഥാന സര്‍ക്കാര്‍ അവലംബിച്ചിട്ടുള്ള നിര്‍ണയ, നിരീക്ഷണ, ചികിത്സാ രീതികളിലൂടെ രോഗവ്യാപനം ഫലപ്രദമായി തടഞ്ഞുനിര്‍ത്തുന്നതിന് സാധിക്കുന്നു എന്നതിനാല്‍, ഈ ഊര്‍ജത്തോടും ശാസ്ത്രീയാവബോധത്തോടും മുന്നോട്ടു പോയാല്‍ നമുക്ക് ഈ മഹാമാരിയെ കീഴടക്കുവാന്‍ സാധിക്കുമെന്നും കെ.ജി.എം.ഒ.എ മുഖ്യമന്ത്രിക്ക് നല്‍കിയ കത്തില്‍ അറിയിച്ചു.
കൊവിഡ്-19ന്റെ സമൂഹവ്യാപന സാധ്യത പൂര്‍ണമായും തള്ളിക്കളയാനാവാത്ത സ്ഥിതിയുള്ളതിനാല്‍ ഒ.പികളുടെ പ്രവര്‍ത്തനത്തില്‍ നിയന്ത്രണം നടത്തണം. പ്രാഥമിക തലത്തിലെ പി.എച്ച്.സി, എഫ്.എച്ച്.സി, സി.എച്ച്.സി തുടങ്ങിയ ആശുപത്രികളിലെ ഒ.പി സമയം ഒന്‍പതു മുതല്‍ രണ്ടു വരെയാക്കി നിജപ്പെടുത്തണം. കൂടുതല്‍ ആള്‍ക്കാരെ പരിശോധനയ്ക്ക് വിധേയരാക്കണമെന്നും ലോ റിസ്‌ക് സമ്പര്‍ക്കമുള്ള രോഗികളുടെയും രോഗികളോ രോഗലക്ഷണമില്ലാത്തവരോ എന്ന വ്യത്യാസമില്ലാതെ ഹൈ റിസ്‌ക് സമ്പര്‍ക്കമുള്ള എല്ലാവരുടെയും സ്രവ പരിശോധന നടത്താന്‍ നിര്‍ദ്ദേശിക്കുന്നത് നന്നായിരിക്കുമെന്നും കെ.ജി.എം.ഒ.എ ചൂണ്ടിക്കാട്ടി.
ലോക്ക് ഡൗണ്‍ അവസാനിച്ചാലും ചെറിയ തോതിലുള്ള നിയന്ത്രണങ്ങളെങ്കിലും തുടര്‍ന്നു കൊണ്ട് പോകുന്നത് നന്നായിരിക്കും. ചെറിയ ഒരു ഇടവേള നല്‍കിയ ശേഷം നിയന്ത്രണങ്ങള്‍ ഇന്നത്തെ രീതിയില്‍ പുനരാരംഭിക്കുന്നതും പരിഗണിക്കാവുന്നതാണെന്നും കെ.ജി.എം.ഒ.എ മുഖ്യമന്ത്രിക്ക് നല്‍കിയ കത്തില്‍ അറിയിച്ചു.