ഇരിട്ടി: അഭിഭാഷകനും സുഹൃത്തും കൂടി വീട്ടില്‍ മദ്യപാനം അതിരുകടന്നപ്പോള്‍ അഭിഭാഷകന്റെ ഭാര്യ പൊലിസില്‍ വിവരമറിയിച്ചതിനെ തുടര്‍ന്ന് പരാതി അന്വേഷിക്കാനെത്തിയ ഉദ്യോഗസ്ഥന് വെട്ടേറ്റു. ഇരിട്ടി സ്റ്റേഷനിലെ അഡീഷണല്‍ എസ്.ഐ ഹരിദാസിനാണ് വെട്ടേറ്റത്. സംഭവത്തില്‍ വള്ളിത്തോടിലെ അഡ്വ. സാബു വര്‍ഗീസും സുഹൃത്ത് മട്ടന്നൂര്‍ സ്വദേശി പ്രിയേഷും അറസ്റ്റിലായി. ഇവരെ പിന്നീട് കോടതി റിമാന്‍ഡ് ചെയ്തു. സംഭവത്തെക്കുറിച്ച് പൊലിസ് പറയുന്നത് ഇങ്ങനെ. തിങ്കളാഴ്ച രാത്രി സുഹൃത്തിനൊപ്പം വള്ളിത്തോടെ വീട്ടിലെത്തിയ അഭിഭാഷകന്‍ മദ്യപിക്കുകയും അതിരുകടന്നപ്പോള്‍ അസഭ്യ വര്‍ഷവും വീട്ടില്‍ ബഹളവുമുണ്ടാക്കിയതോടെ സാബു വര്‍ഗീസിന്റ ഭാര്യ ഇരിട്ടി പൊലിസ് സ്റ്റേഷനിലേക്ക് വിളിച്ച് പരാതി പറയുകയായിരുന്നു. സംഭവം അന്വേഷിക്കാന്‍ ഇരിട്ടി അഡീഷണല്‍ എസ്.ഐ ഹരിദാസിന്റെ നേതൃത്വത്തില്‍ പൊലിസ് വീട്ടിലെത്തി. എന്നാല്‍ വീട്ടിലെത്തിയ ഹരിദാസിനെ പ്രകോപിതനായ സാബു ആക്രമിക്കുകയും തള്ളി താഴെയിട്ടശേഷം കത്തി കൊണ്ട് വെട്ടി പരുക്കേല്‍പ്പിക്കുകയുമായിരുന്നു. കൈവിരലിനും തലയ്ക്കും പരുക്കേറ്റ ഹരീദാസന്‍ ഇരിട്ടി താലൂക്ക് ആശുപത്രിയില്‍ ചികിത്സയിലാണ്. പൊലിസിനെ ആക്രമിച്ച് വധിക്കാന്‍ ശ്രമിച്ചതിനുള്‍പ്പെടെ അഭിഭാഷകനും സുഹൃത്തിനുമെതിരേ വധശ്രമത്തിനുള്‍പ്പെടെ ജാമ്യമില്ലാ വകുപ്പു പ്രകാരം അറസ്റ്റുചെയ്യുകയായിരുന്നു.