നീലേശ്വരം: ഫോട്ടോഗ്രഫര്‍മാരുടെ ജൈവകൃഷി കാണാന്‍ മന്ത്രിയെത്തി. മെയിന്‍ബസാറില്‍ പാതയോരത്തുള്ള ജൈവകൃഷി കാണാനെത്തിയ മന്ത്രിയെ ഫോട്ടോഗ്രഫര്‍മാര്‍ ജൈവവിഭവ ബൊക്കയും കണിക്കൊന്നയും നല്‍കി സ്വീകരിച്ചു. തുടര്‍ന്നു കൃഷി രീതിയെക്കുറിച്ചു മന്ത്രി ചോദിച്ചറിഞ്ഞു. ഈ മാതൃക എല്ലാവരും പിന്തുടരണമെന്നും മന്ത്രി പറഞ്ഞു.
സി.പി.ഐ നേതാവ് പി വിജയകുമാറില്‍ നിന്നും കൗണ്‍സലര്‍ പി ഭാര്‍ഗവിയില്‍ നിന്നും കൃഷിയെക്കുറിച്ചറിഞ്ഞ മന്ത്രി വി.എസ് സുനില്‍കുമാര്‍ കാണാന്‍ ആഗ്രഹം പ്രകടിപ്പിക്കുകയായിരുന്നു.
നഗരസഭാ ചെയര്‍മാന്‍ പ്രൊഫ.കെ.പി ജയരാജന്‍, കൗണ്‍സലര്‍ പി ഭാര്‍ഗവി, കൃഷി അസിസ്റ്റന്റ് ഡയരക്ടര്‍ ആര്‍ വീണാറാണി, കൃഷി ഓഫിസര്‍ കെ.പി രേഷ്മ, പി വിജയകുമാര്‍, കെ.പി.വി.യു ജില്ലാ സെക്രട്ടറി കനകാംബരന്‍, കെ മോഹനന്‍, സര്‍ഗം വിജയന്‍, എ.ആര്‍ ബാബു എന്നിവരും സംബന്ധിച്ചു.