മഞ്ചേരി: നിപാ വൈറസടക്കം പകര്‍ച്ചവ്യാധികള്‍ പടരുമ്പോഴും മഞ്ചേരി മെഡിക്കല്‍ കോളജില്‍ സേവനനിരതരായി എസ്.കെ.എസ്.എസ്.എഫ് വിഖായ വളണ്ടിയര്‍മാര്‍. മെഡിക്കല്‍ കോളജിലെത്തുന്ന പനി ബാധിതര്‍ ഉള്‍പ്പെടെയുള്ള രോഗികള്‍ക്ക് ഒ.പികളിലും വാര്‍ഡുകളിലും കാഷ്വാലിറ്റികളിലും വിഖായ സേവനം നല്‍കുന്നുണ്ട്.
നിരാലംബരും വയോധികരുമായ രോഗികള്‍ക്കാണ് ഈ പ്രവര്‍ത്തനം കൂടുതല്‍ ആശ്വാസമാകുന്നത്. മഞ്ചേരി മെഡിക്കല്‍ കോളജ് ആശുപത്രി കേന്ദ്രീകരിച്ച് 230 വിഖായ വളണ്ടിയര്‍മാരാണ് നിലവില്‍ സേവന പ്രവര്‍ത്തനങ്ങള്‍ നടത്തിവരുന്നത്. നേരത്തെ ഷെഡ്യൂള്‍ ചെയ്യുന്നതു പ്രകാരം ഒരോ ദിവസങ്ങളിലും ആറു പേരടങ്ങുന്ന ടീം രാവിലെ ഒന്‍പതു മുതല്‍ വൈകിട്ട് ആറു വരെയും മറ്റൊരു ടീം വൈകിട്ട് ആറു മുതല്‍ രാത്രി പത്തു വരെയും സേവനം ചെയ്യുന്നു. ജലീല്‍ ഫൈസി അരിമ്പ്രയാണ് മെഡിക്കല്‍ കോളജ് വിഖായ ടീമിന്റെ പ്രവര്‍ത്തനങ്ങളെ ഏകോപിപ്പിക്കുന്നത്.