കൊല്ലം: സംസ്ഥാന സര്‍ക്കാര്‍ പൊതുവിദ്യാഭ്യാസനയത്തെ സംസ്ഥാനത്തെ സ്വകാര്യ വിദ്യാഭ്യാസ മാഫിയാ മാനേജ്‌മെന്റുകള്‍ക്ക് അടിയറവ് വെക്കുകയാണെന്ന്് യൂത്ത് കോണ്‍ഗ്രസ്. ഇതിന്റെ ഒടുവിലത്തെ ഉദാഹരണമാണ് പരിസ്ഥിതി ദിനാചരണത്തിന്റെ കൊല്ലം ജില്ലാതല ഉദ്ഘാടനം വടക്കേവിളയിലെ സ്വകാര്യ സ്‌കൂളില്‍ നടത്തിയതിലൂടെ വ്യക്തമാകുന്നത്. പൊതുവിദ്യാഭ്യാസത്തെ പടിയടച്ച് പിണ്ഡം വെക്കുന്ന സംസ്ഥാന സര്‍ക്കാരിന്റെ നടപടിയില്‍ പ്രതിഷേധിച്ച് യൂത്ത് കോണ്‍ഗ്രസ് പ്രതീകാത്മകമായി കൊല്ലം ഡി.ഡി ഓഫിസിന് മുന്നില്‍ പിണ്ഡം വച്ച് തെങ്ങ്, വാഴ, ചേമ്പ് തുടങ്ങിയ ചെടികള്‍ നട്ട് പ്രതിഷേധിച്ചു.
സി.പി.എം ഭരണം സംസ്ഥാനത്ത് സ്വകാര്യവിദ്യാഭ്യാസ തലവരിക്കാരെ വ്യാപകമാക്കിയിരിക്കുന്നു. നെല്‍വയല്‍ നികത്തി കെട്ടിടങ്ങള്‍ പണിഞ്ഞ സ്വകാര്യ സി.ബി.എസ്.ഇ സ്‌കൂളിന്റെ അങ്കണത്തിലാണ് പരിസ്ഥിതിദിനാചരണത്തിന്റെ ഉദ്ഘാടനം നടന്നത്. ഇത് പരിസ്ഥിതി ദിനാചരണത്തോടും പരിസ്ഥിതി പ്രവര്‍ത്തനങ്ങളോടുമുള്ള സര്‍ക്കാരിന്റെയും സി.പി.എമ്മിന്റെയും വെല്ലുവിളിയാണെന്നും യൂത്ത് കോണ്‍ഗ്രസ് ആക്ഷേപിച്ചു. യൂത്ത് കോണ്‍ഗ്രസ് ജില്ലാ ജനറല്‍ സെക്രട്ടറി ആര്‍.എസ് അബിന്‍ പ്രതിഷേധപരിപാടി ഉദ്ഘാടനം ചെയ്തു.
അസംബ്ലി പ്രസിഡന്റ് അഡ്വ. വിഷ്ണു സുനില്‍ പന്തളം അധ്യക്ഷനായി. ഒ.ബി രാജേഷ്, ഷാ സലീം, പ്രജി കൈതക്കോട്, സച്ചിന്‍, അര്‍ഷാദ്, ഉല്ലാസ്, അര്‍ജ്ജുന്‍, സുബലാല്‍, നിഥിന്‍ ത സംസാരിച്ചു.