കോഴിക്കോട്: ഒളവണ്ണ പഞ്ചായത്തിന്റെ കലാ സാംസ്‌കാരിക സംരഭമായ 'സംസ്‌കാര'യും 'സ്പിക്മാക്കെ' ഡല്‍ഹിയും സംയുക്തമായി സംഘടിപ്പിക്കുന്ന കലാപരിശീലന അവതരണ ശില്‍പശാല'സപര്യ 2017' ന് നാളെ തുടക്കമാകും. പന്തീരാങ്കാവിലെ കൊടല്‍ ജിയുപിസ്‌കൂളിലാണ് ഭാരതീയ ശാസ്ത്രീയ നാടന്‍ കലാരൂപങ്ങളുടെ ശില്‍പശാലയും അവതരണവും നടക്കുക. പാവക്കൂത്ത്, ഭരതനാട്യം, കഥകളി, മോഹിനിയാട്ടം, കുച്ചുപ്പുടി, കഥക്, വര്‍ളി പെയ്ന്റിങ്ങ്, മ്യൂറല്‍ പെയ്ന്റിങ്, കണ്‍ണ്ണാടക സംഗീതം എന്നീ കലാരൂപങ്ങളില്‍ പരിശീലനം നല്‍കും. രാവിലെ 9.30 മുതല്‍ വൈകീട്ട് അഞ്ച് വരെയാണ് പരിശീലനം.
തുടര്‍ന്ന് കലാ അവതരണവും നടക്കും. ജില്ലയിലെ 1000 കുട്ടികള്‍ക്ക് പരിശീലനം നല്‍കുമെന്ന് ഭാരവാഹികള്‍ പറഞ്ഞു. വാര്‍ത്താസമ്മേളനത്തില്‍ ഒളവണ്ണ പഞ്ചായത്ത് പ്രസിഡന്റ് തങ്കമണി, ഇ രാമകൃഷ്ണന്‍, ഇ വിശ്വനാഥന്‍, പ്രഗില്‍ പ്രകാശ്, വി സി പ്രമോദ് കുമാര്‍ സംബന്ധിച്ചു.