തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തില്‍ ഡയാലിസിസ് ആവശ്യമായ രോഗികള്‍ക്കും ആശുപത്രികള്‍ക്കുമുള്ള മാര്‍ഗനിര്‍ദേശങ്ങള്‍ കേന്ദ്ര ആരോഗ്യ മന്ത്രാലയം പരിഷ്‌കരിച്ചു. 

നിലവില്‍ ഡയാലിസിസിനു വിധേയമാകുന്നവര്‍ ഒരു കാരണവശാലും ഷെഡ്യൂള്‍ പ്രകാരമുള്ള ഡയാലിസിസ് മുടക്കരുത്. ആശുപത്രികള്‍ ഡയാലിസിസ് യൂനിറ്റിനു പുറത്ത് സ്‌ക്രീനിങ്ങിനായി സ്ഥലം സജ്ജമാക്കി പനി, ചുമ തുടങ്ങിയ പ്രശ്‌നങ്ങള്‍ രോഗികള്‍ക്ക് ഉണ്ടോ എന്ന് ഡയാലിസിസിനു മുന്‍പ് തന്നെ തിരിച്ചറിയണം. 

ഇത്തരം പ്രശ്‌നങ്ങള്‍ ഉണ്ടെങ്കില്‍ ആവശ്യമായ മുന്‍കരുതല്‍ സ്വീകരിച്ചിട്ടു വേണം രോഗികളെ യൂനിറ്റിലേക്ക് പ്രവേശിപ്പിക്കാന്‍. 

കൊവിഡ് രോഗികള്‍ക്ക്  ഡയാലിസിസ് ആവശ്യമായി വന്നാല്‍ രോഗികളെ പ്രധാന യൂനിറ്റിലേക്ക് കൊണ്ടുവരാതെ പോര്‍ട്ടബിള്‍ യൂനിറ്റുകള്‍ അവരുടെ കിടക്കയുടെ സമീപത്തേക്ക് കൊണ്ടുപോകണമെന്നും തുടര്‍ച്ചയായി ഡയാലിസിസ് ആവശ്യമായി വരുമെന്ന് തോന്നിയാല്‍ യൂനിറ്റ് അവിടെ തന്നെ നിലനിര്‍ത്തണമെന്നും പരിഷ്‌കരിച്ച  നിര്‍ദേശത്തില്‍ പറയുന്നു.